U ZŠA ŭ dziŭnych abstavinach zahinuli biełaruska, jaje muž, śviakroŭ, dvoje dačok i sabaka
Palicyja vyśviatlaje abstaviny hibieli ŭ horadzie Bafała-Hroŭv štata Ilinojs 36-hadovaj minčanki Viery Kiślak, jaje muža Andreja, dźviuch dačok (šaścihadovaj Vivijan i čatyrochhadovaj Amielii), a taksama 67-hadovaj śviekryvi, piša «Zierkała» sa spasyłkaj na amierykanskija ŚMI.
Piać členaŭ siamji byli znojdzienyja miortvymi ŭ sieradu, 30 listapada. Pavodle źviestak amierykanskich ŚMI, u toj dzień u adździaleńnie palicyi pastupiŭ zvanok ad kalehi Viery pa pracy. Jana paprasiła pravaachoŭnikaŭ pravieryć, ci ŭsio ź joj u paradku. Kala 11.00 palicejskija padjechali da doma, ale na zvanok nichto nie adkazaŭ. Jany ŭzłamali ŭvachodnyja dźviery i znajšli ŭ domie piać ciełaŭ.
Koranier akruhi Łejk paviedamiła telekanału Fox, što, pavodle danych uskryćcia, usie piaciora zahinuli ad ranieńniaŭ, naniesienych vostrym pradmietam. Akramia taho, u domie znajšli cieła chatniaha hadavanca — sabaki.
Palicyja schilajecca da viersii, što zabojstva nosić bytavy charaktar, ale pakul nie raskryvaje, chto byŭ zavadataram i jakaja zbroja była vykarystanaja.
«Susiedzi byli ŭzrušanyja, kali daviedalisia pra śmierć u ich zvyčajna cichim domie. Dom Kiślaka prastorny i sučasny. Na ich zadnim dvary jość ubudavany ŭ ziamlu basiejn i hulniavaja placoŭka. Rezidencyja ŭsiejanaja kamierami videanazirańnia, a na padjaznoj darožcy pryparkavanyja darahija aŭtamabili. Ale za začynienymi dźviaryma Andrej i Viera Kiślak byli ŭciahnutyja ŭ sudovyja razborki», — paviedamili ŭ efiry Fox.
Biełaruskaja dyjaspara ŭ ZŠA paćvierdziła «Zierkału», što Viera Kiślak pryjechała ŭ ZŠA ź Biełarusi. Na radzimie jana skončyła BDPU im. M. Tanka. Jaje muž, jak miarkujecca, byŭ rasijaninam.
Pavodle źviestak amierykanskich ŚMI, Viera Kiślak padała na razvod u lipieni. Apošniaje sudovaje pasiadžeńnie pa ich razvodzie prajšło napiaredadni trahiedyi, piša Chicago Tribune.
Siabry žančyny raskazali žurnalistam, što jana «žyła ŭ pastajannym strachu» z-za pavodzinaŭ muža. Na hetaj hlebie Viery daviałosia źviartacca ŭ sud pa achoŭnaje pradpisańnie. Susiedka siamji raskazała žurnalistam, što adnojčy Andrej pakinuŭ svaich dačok adnych u miascovym bary i ŭ cełym staviŭsia da ich «varoža».
Pavodle rašeńnia suda, mužčynu było zabaroniena nabližacca da doma, dzie žyła jaho siamja. Adnak 30 vieraśnia jon parušyŭ hetaje patrabavańnie, za što byŭ aryštavany. Na volu jon vyjšaŭ u kastryčniku paśla ŭniasieńnia zakładu ŭ pamiery 5000 dalaraŭ.
Andrej Kiślak taksama źviartaŭsia ŭ sud pa achoŭnaje pradpisańnie suprać Viery, ale jaho chadajnictva było adchilenaje.
Da asabistych prablem siamji dadalisia finansavyja ciažkaści. Pavodle źviestak miascovych haziet, 9 listapada była raspačataja hramadzianskaja sprava ab pazbaŭleńni prava vykupu doma siamji Kiślak. Pavodle sudovych pratakołaŭ, jany nie płacili pa ipatecy ź lipienia 2020 hoda.
ja vied́ principialnaja dievstvieńnica