Palaki abiacajuć biełarusam vizavyja palohki
Centr biełaruskaj salidarnaści paviedamiŭ, što na hetym tydni adbyłasia pracoŭnaja sustreča jaho pradstaŭnikoŭ z čynoŭnikami MZS i MUS Polščy. Padčas hetaj sustrečy, inicyjataram jakoj staŭ polski bok, abmiarkoŭvalisia aktualnyja dla biełarusaŭ vizavyja pytańni: mahčymaść vydačy viz PBH na terytoryi Polščy, vierahodnaje pradaŭžeńnie terminu vydačy humanitarnych viz i palapšeńnie pracy vizavych centraŭ.
Kiraŭnica departamienta pravavoj dapamohi CBS Volha Dabravolskaja raskazała ab prablemach, ź jakimi rehularna sutykajucca biełarusy pry padačy dakumientaŭ na atrymańnie humanitarnaj vizy na terytoryi Polščy. U pryvatnaści, havorka išła pra vypadki, kali ŭ hramadzian Biełarusi nie prymali dakumienty, a admovy davali vyklučna ŭ vusnaj formie.
Taksama zakranuli pytańnie dyskryminacyi biełarusaŭ pa nacyjanalnaj prykmiecie ŭ vizavych centrach na terytoryi Polščy.
Pradstaŭniki MUS i MZS Polščy paabiacali prymać zajavy i razhladać ich u indyvidualnym paradku, a taksama pryniać usie nieabchodnyja miery dla palapšeńnia pracy vizavych centraŭ.
Akramia taho, čynoŭniki raskazali pra płany pradaŭžeńnia terminu, na praciahu jakoha ŭ biełarusaŭ budzie mahčymaść atrymać humanitarnuju vizu na terytoryi Polščy. Takija vizy nibyta možna budzie atrymać da 31 sakavika 2023 hoda zamiest pieršapačatkova zapłanavanaha 31 śniežnia 2022-ha.
Taksama razhladajecca mahčymaść atrymać na terytoryi Polščy vizu Poland Business Harbour. U płanach vydavać ich adnarazova dla tych, chto ŭžo mieŭ padobnuju vizu raniej.
Takija źmieny ŭžo jość u prajekcie pastanovy ab vydačy viz zamiežnikam.
Čytajcie taksama:
U Minsku, Homieli i Mahilovie bolš nielha padacca na polskuju vizu PBH
«U cełym novaŭviadzieńnie vielmi zručnaje». Jak pracuje novaja sistema rehistracyi pry padačy na polskuju vizu
«Na ŭsiu siamju zapłacili 500 dalaraŭ». Jak biełarusy ciapier atrymlivajuć vizy
