Šolc pa telefonie zaklikaŭ Pucina vyvieści vojski z Ukrainy
Kancler Šolc taksama asudziŭ rakietnyja ŭdary RF pa hramadzianskich celach va Ukrainie. Pucin nazvaŭ nazvaŭ abstreły «vymušanymi i niepaźbiežnymi», paviedamlaje Deutsche Welle.
Fota Michael Sohn
Kancler Hiermanii Ołaf Šolc i prezident Rasii Uładzimir Pucin praviali pieršuju ź siaredziny vieraśnia telefonnuju razmovu, padčas jakoj abmierkavali rasijskija abstreły cyvilnaj infrastruktury, padtrymku Ukrainy krainami Zachadu, vybuchi na «Paŭnočnych patokach» i ŭhodu ab eksparcie ŭkrainskaha zbožža praz party na Čornym mory. Pra heta paviedamili ŭ Bierlinie i Maskvie ŭ piatnicu, 2 śniežnia.
«Hadzinnaja hutarka była pryśviečana ahresiŭnaj vajnie Rasii suprać Ukrainy i jaje nastupstvam», — paviedamiła viedamstva druku i infarmacyi fiederalnaha ŭrada. Jak adznačajecca, u chodzie razmovy kancler asudziŭ rasijskija ŭdary pa cyvilnaj infrastruktury Ukrainy i padkreśliŭ «rašučaść Hiermanii padtrymlivać Ukrainu ŭ zabieśpiačeńni jaje abaranazdolnaści ad rasijskaj ahresii». «Kancler zaklikaŭ prezidenta Rasii da chutčejšaha dasiahnieńnia dypłamatyčnaha raźviazańnia, u tym liku da vyvadu rasijskich vojskaŭ», — havorycca ŭ paviedamleńni pres-słužby.
Lidary krain taksama abmierkavali charčovuju situacyju ŭ śviecie — «asabliva napružanuju ŭ vyniku rasijskaj ahresiŭnaj vajny». «Kancler i prezident Rasii damovilisia padtrymlivać kantakt», — dadali ŭ Bierlinie.
Pucin nazvaŭ dapamohu Ukrainie «destruktyŭnaj linijaj»
Jak paviedamlaje pres-słužba Kramla, prezident Pucin zajaviŭ kancleru FRH, što «rakietnyja ŭdary pa vyznačanych celach na terytoryi Ukrainy» źjaŭlajucca «vymušanaj i niepaźbiežnaj reakcyjaj na pravakacyjnyja ataki Kijeva suprać hramadzianskaj infrastruktury Rasii, uklučajučy Krymski most i abjekty enierhietyki».
Akramia taho, Pucin nazvaŭ «destruktyŭnaj» liniju zachodnich dziaržaŭ, jakija akazvajuć Kijevu dapamohu ŭzbrajeńniami i ažyćciaŭlajuć padrychtoŭku ŭkrainskich vajskoŭcaŭ. Na dumku Maskvy, «usio heta, a taksama ŭsiebakovaja palityčnaja i finansavaja padtrymka Ukrainy pryvodzić da taho, što Kijeŭ spres adkidvaje ideju jakich-niebudź pieramovaŭ».
Pucin taksama zajaviŭ pra nieabchodnaść «transparentnaha rasśledavańnia» vybuchaŭ na «Paŭnočnych patokach» z udziełam rasijskich profilnych struktur. Akramia taho, lidary krain abmierkavali realizacyju čarnamorskaj zbožžavaj inicyjatyvy ab vyvazie z partoŭ Ukrainy zbožža i spadarožnych praduktaŭ. «Akcentavanaja nieabchodnaść dobrasumlennaha kompleksnaha vykanańnia «zbožžavaj uhody», što značyć likvidacyju ŭsich barjeraŭ i dla rasijskich pastavak», — paviedamili ŭ Kramli.
