Google zachavaŭ u ličbavym vyhladzie pomniki ŭkrainskaj kultury
Va Ukrainie razburanyja abo paškodžanyja 500 muziejaŭ i histaryčnych budynkaŭ. Na płatformie Google Arts & Culture adkryłasia śpiecyjalnaja staronka «Ukraina pobač» (Ukraine is Here), pryśviečanaja zachavańniu i papularyzacyi ŭkrainskaj kultury.
Prajekt byŭ padrychtavany karparacyjaj u partniorstvie ź Ministerstvam kultury Ukrainy i najbujniejšymi muziejami krainy. Pracu nad inicyjatyvaj pačali jašče piać hadoŭ tamu, ciapier jana stała asabliva aktualnaj praz vajnu. Turysty ź inšych krain pakul nie mohuć svabodna pryjechać, kab asabista paznajomicca z kulturnaj spadčynaj i słavutaściami Ukrainy. Tym bolš, što ŭ chodzie bajavych dziejańniaŭ mnohija histaryčnyja pomniki, muziei, archivy, biblijateki, relihijnyja i inšyja kulturnyja abjekty ŭžo paškodžany ci razburany, piša Meduza.io.
Prajekt «Ukraina pobač» padzieleny na čatyry asnoŭnyja napramki.
U raździele «Kultura» možna paznajomicca z ukrainskimi narodnymi tradycyjami (śviatkavańnie Vialikadnia i Ivana Kupały, abrady Vadžeńnie kusta i Kalita), historyjaj nacyjanalnych kaściumaŭ i ŭpryhožvańniaŭ, ramiostvaŭ i narodnaj muzyki (naprykład, kazackija dumy kabzaroŭ).
Asobnaja častka pryśviečana ŭkrainskaj kuchni. Karystalniki mohuć daviedacca recepty pryhatavańnia takich straŭ, jak boršč z pampuškami, sała, dzieruny, vareniki, katleta pa-kijeŭsku, bakłažany pa-chiersonsku, pałtaŭskija hałuški, halaška pa-danbasku.
Akramia taho, na płatformie pradstaŭleny filmy, pryśviečanyja sučasnaj modzie, kino, stendapu, tancavalnaj i rejv-kultury Ukrainy.
U raździele «Architektura» karystalniki mohuć pahladzieć na 3D-madeli histaryčnych pomnikaŭ, takich jak:
naprykład, Safijski sabor u Kijevie;
Nacyjanalny teatr opiery i baleta;
Mikałajeŭski kaścioł;
Mastacki muziej u Chiersonie;
Biełharad-Dniastroŭski krepaść u Adeskaj vobłaści;
Zvanica Uśpienskaha sabora ŭ Charkavie;
Padharecki zamak u Lvoŭskaj vobłaści.
Asobnyja hidy pryśviečany Kijevu (siarod punktaŭ naviedvańnia: Dom z chimierami, pomniki Załatyja varoty i Radzima-maci, Kijeva-Piačerskaja łaŭra) i Paciomkinskaj leśvicy ŭ Adesie.
U raździele «Mastactva» možna naviedać virtualnuju halereju, paznajomicca z ekspazicyjaj Čarnihaŭskaha abłasnoha mastackaha muzieja imia Hałahana, pačytać historyju stvareńnia staražytnych abrazoŭ, pahladzieć tvory ŭkrainskich avanhardystaŭ pačatku XX stahodździa (naprykład, karcinu «Čas» Davida Burluka z Mastackaha muzieja Dniapra abo eskiz Alaksandra Chvastenki-Chvastova da opiery «Luboŭ da troch apielsinaŭ», nad jakoj mastak pracavaŭ u 1926-1927 hady ŭ Charkavie) i, narešcie, pahladzieć paviljon Ukrainy na Vieniecyjanskaj bijenale dy inšaje.
Prajekt «Ukraina pobač» padtrymała pieršaja łedzi Ukrainy Alena Zialenskaja.
«Za miesiacy vajny ŭ nas bolš za 500 paškodžanych abo razburanych muziejaŭ, histaryčnych pabudoŭ, chramaŭ. Usio heta stvarałasia pakaleńniami ukraincaŭ dla novych pakaleńniaŭ. Takim čynam, adrazu stała jasna — nam treba ratavać ad našeścia nie tolki našych ludziej, ale i našu kulturu, mastactva. Naša kultura — nie tolki naša. Heta spadčyna ŭsiaho cyvilizavanaha śvietu. Kali kulturnyja kaštoŭnaści hublaje adna kraina, hublaje ŭvieś śviet. Tak što davajcie zachoŭvać i prymnažać, hladzieć, zachaplacca — huhlić ŭkrainskuju kulturu — i tak uzbahačać śviet», — skazała jana.
Ahułam na płatformie Google Arts & Culture ŭ ličbavym vyhladzie raźmieščany ŭžo bolš za šeść miljonaŭ roznych kulturnych artefaktaŭ i zvyš 400 tysiač tvoraŭ mastactva z muziejaŭ 80 krain.
