Biełaruska na konkursie «Mis Ziamla» ŭraziła žury kaściumam z čałaviečych vałasoŭ, a taksama nacyjanalnym strojem
Uradženka Kobryna Lilija Levaja pieramahła ŭ troch naminacyjach — «Lepšy nacyjanalny kaścium Jeŭropy», «Lepšy kaścium faŭny» i atrymała zołata za vychad u kupalniku.
Usie fota: archiŭ hieraini
Finał mižnarodnaha konkursu pryhažości «Mis Ziamla» prajšoŭ 29 listapada na Filipinach. Konkurs pravodzicca z 2001 hoda, jaho arhanizatary majuć na mecie nie tolki arhanizavać šou, ale i pryciahnuć uvahu da ekałahičnych prablem. Pieramožca pavinna być nie prosta pryhožaj, ale i dbać pra pryrodu płaniety.
Madelnaj spravaj Lilija zajmajecca z 17 hadoŭ. Jana skončyła Nacyjanalnuju škołu pryhažości ŭ Minsku. Ciapier žyvie i pracuje ŭ Katary.
Dziaŭčyna raspaviała kobrincity.by, što fizična na konkursie było vielmi ciažka, son pa try hadziny ŭ sutki i pieratamleńnie byli takimi adčuvalnymi, što paśla zakančeńnia konkursu navat spatrebiłasia špitalizacyja dla adnaŭleńnia sił.
Lilija ŭraziła žury kaściumam, całkam zroblenym z čałaviečych vałasoŭ. Ź im jana pieramahła ŭ naminacyi «Lepšy kaścium faŭny».
«Hety harnitur niasie mesedž ab tym, što vałasy vyhladajuć dobra na ludziach, a miech dobra vyhladaje tolki na žyviołach. Žyvioły nie pavinny addavać svaje žyćci dziela niečych modnych strojaŭ», — patłumačyła zadumu Lilija.
Cana kaściuma — 15 000 dalaraŭ. Reč u tym, što jon byŭ zrobleny ź piaci kiłahramaŭ naturalnych čałaviečych vałasoŭ.
Ideju kaściuma Lilii prapanavała siabroŭka Mirasłava Ramanava, taksama biełaruska. Usie videa i fota dla konkursu zrobleny taksama biełaruskaj, Nadziejaj Janinka, jakaja adkryła svaju fotastudyju «Inhype» ŭ Katary, raspaviała Lilija «Viečierniemu Briestu».
Dapamoha talenavitych ziamlačak dapamahła Lilii stać adnoj ź lepšych u konkursie.
Vyjhrała Lilija i ŭ naminacyi «nacyjanalny kaścium». Dziaŭčyna śćviardžaje, što jaje natchniała kultura i styl staražytnaj Biełarusi. Na sukiency — vyšyŭka kvietak ź bisieru i kryštala. Harnitur staŭ lepšym jeŭrapiejskim kaściumam.
Załaty miedal Lilija atrymała taksama za vychad u kupalniku. Kupalnik, piša kobrincity.by, dziaŭčyna zrabiła sama, pavodle «Maleńkaj rusałački».
bo ž byli ŭ historyi vypadki, kali nie tolki vałasy, zuby brali hvałtoŭna, a navat myła rabili ź ludziej...