Brytanskaja raźviedka: Udary pa enierhietycy Ukrainy — realizacyja stratehii pa padaŭleńni voli da supracivu
Vajennaja raźviedka Minabarony Vialikabrytanii ŭbačyła ŭ masiravanych udarach Rasii, jakija z 10 kastryčnika nanosilisia pa enierhietyčnaj sietcy Ukrainy, realizacyju kancepcyi stratehičnaj apieracyi pa źniščeńni krytyčna važnych abjektaŭ, jakaja, pa jaje danych, jość u rasijskaj vajennaj daktrynie, piša RBK-Ukraina.
Vierahodna, heta pieršy prykład taho, jak Rasija sprabuje realizavać kancepcyju, miarkujuć aŭtary štodzionnaj zvodki brytanskaj raźviedki.
Rasija mierkavała, što hetaja kancepcyja budzie realizavana z dapamohaj rakiet vialikaj dalokaści padčas naniasieńnia ŭdaraŭ pa krytyčna važnaj nacyjanalnaj infrastruktury, a nie pa Uzbrojenych siłach. Zadača — demaralizavać nasielnictva i, u kančatkovym vyniku, prymusić lidaraŭ dziaržavy kapitulavać.
Udary Rasii praciahvajuć vyklikać pieraboi z elektraenierhijaj, što pryvodzić da masavych humanitarnych prablem pa ŭsioj Ukrainie.
Brytanskaja raźviedka stavić pad sumnieŭ efiektyŭnaść hetaj stratehii, pakolki, pa jaje danych, Rasija, vierahodna, užo zraschodavała vialikuju častku svaich rakiet. A materyjalny i psichałahičny efiekt ad udaraŭ, chutčej za ŭsio, budzie mienšy, čym kali b jany byli ŭ pačatkovy pieryjad vajny, tak jak ukraincy mabilizavalisia, vynikaje sa zvodki.
