Jakija tury ŭ Jeŭropu prapanujuć biełarusam na zimovyja śviaty. Ahlad cen
Jeŭrapiejskija kirmašy, kaladnyja źnižki ŭ kramach, kazačnaja architektura — toje, što pryvablivaje našych turystaŭ nie pieršy hod. Pahladzieli, što prapanujuć na zimovyja vakacyi turahienctvy.
Fota tut i dalej: pixabay.com.
Polšča
Adnym z samych tannych padarožžaŭ źjaŭlajecca čatyrochdzionny aŭtobusny tur u Krakaŭ, ale ž jon dastupny tolki dla turystaŭ ź vizami. Cana ź pierajezdam — 388 rubloŭ, vyjezd ź Minska zapłanavany na 29 śniežnia. U darozie pryjdziecca pravieści dźvie nočy, a na astatnija dźvie prapanujuć trochzorkavyja haścinicy.
Ale ž 380 rubloŭ — heta bolš markietynhavy chod, jakim tradycyjna karystajucca turfirmy. Dadatkova treba budzie zapłacić 50 rubloŭ za turpasłuhu, samomu nabyć miedstrachoŭku, a taksama patracicca na ekskursii (zvyčajna ad 10 jeŭra na čałavieka).
A pajezdki ŭ polski kurort Zakapane pradajucca jak minimum na 6 dzion i kaštujuć ad 900 rubloŭ. U takim tury taksama pryjdziecca pravieści 2 nočy ŭ aŭtobusie. Ale ž tut turpasłuha budzie kaštavać 100 rubloŭ. Jana apłačvajecca dadatkova, jak i prakat harnałyžnaha abstalavańnia, ekskursij, śviatočnaj navahodniaj viačery i inšaha.
Čechija
Chto nie maryŭ naviedać pieradkaladnuju Prahu? Hety nakirunak zastajecca adnym z samych papularnych siarod turahienctvaŭ. Kab sustreć Novy hod u češskaj stalicy, biełarusam treba zapłacić ad 275 jeŭra i turystyčny zbor — ad 50 rubloŭ. Daty — z 29 śniežnia pa 2 studzienia.
Vialiki plus, što načavać u aŭtobusie treba budzie tolki adnojčy — paśla adpraŭleńnia ź Minska. Jak bonus — u pieršy dzień novaha hoda turystam prapanujuć źjeździć i ŭ Drezden. Pra vizu treba pakłapacicca samastojna.
Hiermanija
Turystyčnyja pajezdki pa maršrucie Minsk — Bierlin — Minsk pačynajucca ad čatyroch dzion. Što pryjemna, jość tury biez načnych pierajezdaŭ, ale ž u samim Bierlinie vy prabudziecie «čystymi» dva dni. Turfirma, jakaja prapanoŭvaje pucioŭku za 638 rubloŭ, dapamahaje i z adkryćciom vizy (praŭda, praz hrecki centr). U košt pucioŭki ŭvachodzić prajezd, pražyvańnie ŭ hatelach, ahladnaja ekskursija pa niamieckaj stalicy i try śniadanki.
Italija i Manaka
Cana na navahodnija tydniovyja vakacyi ŭ Rymie startuje ad 355 jeŭra plus 50 rubloŭ za turpasłuhu z čałavieka. Akramia taho, za siem dzion hrupa naviedaje Budapiešt, Prahu, Fłarencyju, San-Džymińjana i pieražyvie dva načnyja pierajezdy. Turahienctva, jakoje arhanizuje tur, taksama dapamahaje i z adkryćciom šenhienskich viz.
Šaścidzionnaja pajezdka Viena — Vieniecyja — Vičenca — Vierona — Miunchien — Praha z sustrečaj Novaha hoda ŭ Vieniecyi kaštuje ad 980 rubloŭ na čałavieka.
Sustreć śviata ŭ Manaka i pravieści tam ahułam tydzień — ad 1000 rubloŭ.
Aŭstryja
Novy hod u Vienie dastupny tolki dla turystaŭ, u jakich užo jość vizy. Vyjezd ź Minska płanujecca 28 śniežnia, a sam tur zaciahniecca na 5 dzion. Za takuju pajezdku treba budzie asłabić kašalok na bolš jak tysiaču rubloŭ, nie ŭličvajučy apłaty pasłuh turfirmy — 100 rubloŭ z čałavieka. Ale ž tolki adzin načny pierajezd — i toj ź Minska. U prahramu pucioŭki ŭvachodziać u tym liku piać śniadankaŭ i ekskursijnaje absłuhoŭvańnie, ale ž uvachodnyja kvitki ŭ muziei i strachoŭku treba apłacić samim.
Francyja
Biełaruskija turahienctvy prapanujuć navahodnija pajezdki ŭ Paryž minimum jak na 6 dzion i ad 700 rubloŭ na čałavieka. Mienavita ŭ Paryžy turysty praviaduć try dni, u tym liku i navahodniuju noč — astatni čas zojmie daroha z zajezdami na ekskursii ŭ Prahu i Bierlin.
Znoŭ ža, na takija pajezdki ŭ asnoŭnym zaprašajuć turystaŭ ź vizami.
Što ź siabie ŭjaŭlaje sustreča Novaha hoda?
Va ŭsich prapanavanych turach, jakija my razhledzieli, pravieści navahodniuju noč prapanujuć u centrach haradoŭ, siarod kaladnych kirmašoŭ z hlintviejnam i kancertaŭ.
