Na volu vyjšli hieroi studenckaha ruchu
Siońnia vyzvalilisia 10 čałaviek, jakija siadzieli pa «spravie studentaŭ». Ich vypuskajuć z kałonij pa adnym, vakoł dziažurać šmatlikija cichary, paviedamili «Našaj Nivie» vidavočcy.
Pieršaj vyzvalili Ałanu Hiebremaryjam. Paźniej stała viadoma pra vyzvaleńnie Kaci Budźko, Anastasija Bułybienka, Viktoryi Hrankoŭskaj, Maryi Kalenik, Jany Arabiejki, Ksienii Syramałot, Jahora Kanieckaha i Illi Trachtenbierha. Vyjšła na volu taksama vykładčyka Volha Fiłatčankova.
Takim čynam, za kratami zastajecca tolki Taćciana Jekielčyk, jakaja była zatrymanaja paźniej za inšych fihurantaŭ. Jana pavinna vyzvalicca 15 śniežnia.
Dziaŭčaty znachodzilisia ŭ žanočaj kałonii Homiela, Ilja Trachtenbierh — u Mahiloŭskaj kałonii, viadomaj svaim žorstkimi ŭmovami dla palitźniavolenych.
Jany byli zatrymanyja 12 listapada 2020 hoda.
U lipieni 2021 hoda ŭsich fihurantaŭ spravy, akramia Hleba Ficniera, asudzili na 2,5 hoda kałonii. Ficnier atrymaŭ dva hady i vyzvaliŭsia niekalki miesiacaŭ tamu.
Taćciana Jakielčyk, jakaja była aryštavanaja paźniej, maje vyzvalicca praź niekalki tydniaŭ.
Ź infarmacyi Śledčaha kamiteta vynikaje, što ŭsiaho ŭ Biełarusi z 2020 hoda zaviedziena da 12 tysiač palityčna matyvavanych kryminalnych spraŭ, ich fihurantami stali dziasiatki tysiač ludziej. Łukašenkaŭcy aznačajuć takija spravy eŭfiemizmam «ekstremisckaja skiravanaść». Akramia ich, niekatoryja spravy nosiać farmalna ekanamičny charaktar, choć źjaŭlajucca ŭ realnaści palityčnymi, jak spravy Babaryki, Tut.baja, «Našaj Nivy» dy mnohija inšyja.
Jašče nie mienš za 50 tysiač čałaviek prajšli praz administracyjnyja zatrymańni. Dakładnyja ličby nieviadomyja.
Na hety momant u turmach znachodzicca niekalki tysiač palityčnych viaźniaŭ. Dakładnuju ličbu taksama vyznačyć niemahčyma, bo ich vielmi šmat, a zbor infarmacyi, asabliva ŭ rehijonach, uskładnieny.
Z prapahandy, jakoj supravadžajucca represii, vynikaje, što łukašenkaŭcy pomściać za 2020 hod i chočuć dabicca, kab biełarusy bolš nikoli nie vychodzili na vulicy i nie patrabavali svabodnych vybaraŭ i prava naroda samomu vybirać uładu. Takich masavych represij za apošnija paŭstahodździa nie viedaŭ nivodzin inšy narod Jeŭropy.
