Znajšlisia śviedčańni, što Uładzimir Pucin asabista ŭdzielničaŭ u pieratrusach u savieckich dysidentaŭ
U 1976 hodzie Uładzimir Pucin, ź vielmi vysokaj dolaj vierahodnaści, asabista ŭdzielničaŭ u pieratrusie ŭ kvatery pieciarburhskaha piśmieńnika Aleha Vołkava, paźniej zasudžanaha na 7 hadoŭ pazbaŭleńnia voli za «antysavieckuju ahitacyju i prapahandu», piša «Svaboda».
Pratakoł z Muzieja palityčnaj historyi. Fota: ksholmov / Facebook
Na pratakoł pieratrusu, jaki vystaŭleny ŭ Muziei palityčnaj historyi ŭ Sankt-Pieciarburhu, źviarnuŭ uvahu historyk Kanstancin Šołmaŭ. U dakumiencie Pucin značycca jak «lejtenant KDB», nijakich inšych źviestak nie pryvodzicca. Kali aryjentavacca na aficyjnuju bijahrafiju prezidenta Rasii, to ŭ dzień pieratrusu, 13 vieraśnia 1976 hoda, jamu było 23 hady, jon užo prajšoŭ kursy padrychtoŭki apieratyŭnaha składu KDB i sapraŭdy byŭ atestavany jak «staršy lejtenant justycyi terytaryjalnych orhanaŭ» savieckaj śpiecsłužby.
Akramia taho, u pratakole pieratrusu jak niepasredny jaho ŭdzielnik značycca lejtenant KDB Košaleŭ, jaki, jak i Pucin, pracavaŭ paźniej u Administracyi mera Sankt-Pieciarburha Anatola Sabčaka.
Akcyja Vołkava i Rybakova. Fota: ksholmov / Facebook
3 žniŭnia 1976 hodu ŭ Sankt-Pieciarburhu na ścianie Pietrapaŭłaŭskaj krepaści mastak i pravaabaronca Julij Rybakoŭ, a taksama piśmieńnik Aleh Vołkaŭ napisali biełaj farbaj nadpis daŭžynioj sorak mietraŭ: «Vy raśpinajecie svabodu, ale duša čałavieka nie viedaje kajdanoŭ!»
Paźniej aŭtaraŭ nadpisu aryštavali i zasudzili na praciahłyja terminy źniavoleńnia: Vołkava — na 7 hadoŭ pazbaŭleńnia voli, Rybakova — na 6 hadoŭ.
Pa słovach Julija Rybakova, ciapierašni prezident Rasii Uładzimir Pucin taksama asabista ŭdzielničaŭ u pieratrusie ŭ piśmieńnicy Julii Vaźniasienskaj, jakaja prykładna ŭ toj ža čas była aryštavanaja i abvinavačanaja ŭ antysavieckaj prapahandzie.
