ISW: Rasijanie viedajuć, što nie zmohuć pieraškodzić USU pierajści Dniapro
Amierykanski instytut vyvučeńnia vajny (ISW) apublikavaŭ štodzionny dakład z analizam karciny vajennych dziejańniaŭ va Ukrainie da ranicy paniadziełka. Na hety raz aŭtary dakłada «aceńvajuć abarončyja pazicyi, jakija rasijskija vojski zajmajuć va ŭschodniaj častcy Chiersonskaj vobłaści, i toje, što hetyja pazicyi kažuć pra čakańni Rasii ŭ dačynieńni da budučych apieracyj u hetym rajonie».
Asnoŭnuju vysnovu, zroblenuju ŭ dakumiencie, možna ścisła sfarmulavać tak: rasijskaje kamandavańnie vydatna razumieje, što USU mohuć praktyčna ŭ luby momant farsiravać Dniapro i praciahnuć kontrnastupleńnie na levym bierazie raki, va ŭschodniaj častcy Chiersonskaj vobłaści.
Bolš za toje, praciahvajuć aŭtary dakłada, rasijskija siły nie majuć iluzij adnosna svaich mahčymaściaŭ i «vidavočna nie raźličvajuć, što zmohuć pieraškodzić ukrainskim vojskam pierajści raku» — a tamu navat nie robiać nijakich namahańniaŭ, kab pasprabavać spynić pierapravu.
Razhladajučy varyjanty dalejšaha raźvićcia padziej, aŭtary asobna padkreślivajuć, što ŭsie pryviedzienyja scenary — tearetyčnyja vykładki, a sami jany nie pieraśledujuć mety «vyznačyć, ci majuć namier ukrainskija siły farsiravać Dniapro» (abo navat ci zdolnyja jany na hety krok), abo sprahnazavać, ci raspačnuć USU takuju sprobu.
