SK Biełarusi sioleta zarehistravaŭ užo 4300 palityčnych «złačynstvaŭ»
Śledčy kamitet Biełarusi z pačatku 2022 hoda zarehistravaŭ 4 300 «złačynstvaŭ ekstremisckaj nakiravanaści», zajaviŭ u intervju «SB. Biełaruś siehodnia» namieśnik staršyni SK Anatol Vasiljeŭ.
Pry hetym, pavodle jaho, bolš za pałovu ź ich «ździejśniena ŭ 2020—2021 hadach», tamu «možna zrabić vysnovu, što pavieličeńnia kolkaści takich złačynstvaŭ niama».
Ahułam z 2020 hoda SK zafiksavaŭ u Biełarusi bolš za 11 tysiač «ekstremisckich» złačynstvaŭ, u asnoŭnym paśla prezidenckich vybaraŭ. Pavodle Vasiljeva, čaściej za ŭsio jany ździajśniajucca za miežami našaj krainy i ŭ internecie».
Taksama Vasiljeŭ raskazaŭ pra rasśledavańnie bolš za 30 kryminalnych spraŭ za «akt teraryzmu» (art. 289 KK). Pavodle jaho, častka z hetych spraŭ razhladajecca, pa častcy ŭžo pryniata rašeńnie, astatnija nakiravany ŭ prakuraturu dla nastupnaha razhladu ŭ sudzie.
«U pryvatnaści, havorka idzie ab teraktach na čyhunačnych i aŭtamabilnych šlachach», — adznačyŭ Vasiljeŭ. Jak śćviardžaje namieśnik staršyni SK, «takija złačynstvy ŭčynialisia pa zadańni zamiežnych kurataraŭ ekstremisckich supolnaściaŭ», tamu ŭ asobnych vypadkach złačyncam dadatkova stavicca ŭ vinu i zdrada dziaržavie.
