ŚMI: Brytanija pieradała Ukrainie rakiety Brimstone 2 z łaziernym naviadzieńniem. Čym jany admietnyja
Brytanija adpraviła Ukrainie ŭdaskanalenuju madel vysokatechnałahičnaj rakiety ź sistemaj łaziernaha samanaviadzieńnia Brimstone, dalokaść palotu jakoj udvaja bolšaja, čym u papiaredniaj viersii, piša Daily Telegraph.
MBDA Systems
Rakiety Brimstone 2 zvyčajna zapuskajucca sa źniščalnikaŭ, adnak ukrainskija vojski vykarystoŭvajuć u jakaści puskavoj płatformy madyfikavanyja hruzaviki.
Vialikabrytanija ŭpieršyniu pieradała Ukrainie rakiety Brimstone pieršaha pakaleńnia šeść miesiacaŭ tamu, ale na videazapisie, apublikavanym raniej karaleŭskimi VPS, vidać, jak bolš daskanałaja madel rychtujecca da transpartavańnia na bazie ŭ Oksfardšyry.
Rakiety, kožnaja ź jakich kaštuje kala 175 tysiač funtaŭ sterlinhaŭ, pryznačanyja ŭ asnoŭnym dla źniščeńnia naziemnych celaŭ, u tym liku transpartnych srodkaŭ, jakija ruchajucca ź vialikaj chutkaściu.
Brimstone, u pryvatnaści, mohuć samastojna vybirać bolš prydatnuju cel z zahadzia zaprahramavanaha śpisa z dapamohaj vysokačastotnaha radara, nie čapajučy pry hetym cyvilnyja transpartnyja srodki abo mienš važnuju vajennuju techniku praciŭnika.
Uličvajučy łaziernaje naviadzieńnie i vysokuju dakładnaść, rakiety mohuć zapuskacca ŭ hustanasielenych rajonach, što źnižaje vierahodnaść achviar siarod mirnaha nasielnictva.
Premjer-ministr Brytanii Ryšy Sunak padčas vizitu ŭ Kijeŭ u minułyja vychadnyja abviaściŭ pra vydzialeńnie Ukrainie čarhovaha pakieta vajennaj dapamohi 50 młn funtaŭ, nahadvaje vydańnie.
