U Hrodnie likvidujuć praz sud pošukava-vyratavalny atrad, jaki dapamahaŭ šukać źnikłych ludziej
U Hrodzienskim abłasnym sudzie likvidujuć pošukava-vyratavalny atrad «Anhieł Sieviero-Zapad», jaki dapamahaŭ šukać źnikłych ludziej. Zajava ab likvidacyi hramadskaha abjadnańnia padadziena Hałoŭnym upraŭleńniem justycyi Hrodzienskaha abłvykankama, pasiedžańnie pryznačanaje na 25 listapada.
Arhanizacyja była zarehistravanaja ŭ Smarhoni i dziejničaje z 2015 hoda.
Uvieś hety čas atrad dapamahaŭ MNS i milicyi ŭ pošuku ludziej, jakija źnikli ci niedzie zhubilisia. Vałanciory raspaŭsiudžvali infarmacyju ŭ internecie, rasklejvali aryjenciroŭki, vyjazdžali na haradskija i lasnyja pošuki.
Siarod inšaha vosieńniu 2017 hoda atrad dapamahaŭ šukać 11-hadovaha Maksima Marchaluka ź vioski Novy Dvor Śvisłackaha rajona, jaki prapaŭ u Biełaviežskaj puščy. 16 vieraśnia chłopčyk adpraviŭsia ŭ les u hryby, i z taho času jaho nichto nie bačyŭ.
U maštabnaj pošukava-vyratavalnaj apieracyi, jakaja prachodziła na terytoryi niekalkich krain, brali tady ŭdzieł tysiačy čałaviek, u tym liku vałanciory atrada «Anhieł Sieviero-Zapad», ale znajści dzicia tak i nie ŭdałosia.
