Stała viadoma, chto viadzie rasijski vajenny telehram-kanał «Rybaŕ»
Vydańnie The Bell vypuściła rasśledavańnie pra toje, chto viadzie rasijski vajenny telehram-kanał «Rybaŕ». Hety kanał publikuje samyja padrabiaznyja zvodki i samyja dakładnyja karty bajavych dziejańniaŭ, na jaho spasyłajucca CNN, Bloomberg i zachodnija vajskovyja ekśpierty. Niaredka jon źjaŭlajecca krynicaj i dla ahladaŭ padziej na froncie, jakija rychtuje «Naša Niva». Za čas vajny kanał nabraŭ 1,1 miljona padpisčykaŭ.
Zastaŭka telehram-kanała «Rybaŕ»
Sami stvaralniki «Rybaria» ŭ sakaviku 2020 hoda śćviardžali, što ich dvoje, a siabie apisvali tak:
«Vajskovy pierakładčyk — śpiecyjalist pa OSINT'y i palittechnołah, pradstaŭnik staradaŭniaj arystakratyi».
The Bell śćviardžaje, što ŭstanaviła asobu adnaho z hetych ludziej — «palittechnołaha, pradstaŭnika staradaŭniaj arystakratyi». Jaho zavuć Dzianis Ščukin — heta 44-hadovy maskoŭski prahramist. U 2001 hodzie jon atrymaŭ hramadzianstva Rasii zamiest hramadzianstva FRH u konsulskim adździele MZS Rasii ŭ Kyrhyzstanie.
The Bell źviazaŭsia sa Ščukinym praź jaho telehram-akaŭnt, ale na pytańni pra stvaralnikaŭ i aŭtaraŭ «Rybaria» i pracu kanała jon nie adkazaŭ, choć svajho ŭdziełu ŭ viadzieńni kanała nie admaŭlaŭ: «Ja nie źbirajusia deananimiravać supracoŭnikaŭ, vydavać niešta, što možna vykarystoŭvać suprać nas… Tak što prabačcie, ale nie. Dziakuj za hutarku».
Telehram-kanał «Rybaŕ» adnosicca da tych rasijskich «patryjatyčnych» resursaŭ, jaki ŭ pryncypie padtrymlivaje praviadzieńnie «śpiecapieracyi va Ukrainie», ale pry hetym surova krytykuje dziejańni rasijskaha vajskovaha kamandavańnia i nie chavaje niazručnych dla jaho faktaŭ.
