U Homieli vynieśli prysud Alaksandru Ajnutdzinavu
Homielski abłasny sud vynies prysud 46-hadovamu žycharu abłasnoha centra Alaksandru Ajnutdzinavu, jakoha abvinavacili ŭ sprobie dałučycca da pałka imia Kastusia Kalinoŭskaha. Sudovy praces vioŭ sudździa Viačasłaŭ Kaluka, paviedamlaje «Viasna».
Pa materyjałach śledstva, Ajnutdzinaŭ sabraŭ infarmacyju ab paradku i sposabie ŭstupleńnia va ŭzbrojenaje farmiravańnie, jakoje ŭvachodzić u skład Uzbrojenych sił Ukrainy. Paśla hetaha jon nibyta nakiravaŭsia na biełaruska-ŭkrainskuju miažu dla jaje niezakonnaha pierasiačeńnia, adnak byŭ zatrymany biełaruskimi pamiežnikami.
Akramia taho, łukašenkaŭskija siłaviki skarystalisia z mahčymaści inkryminavać Alaksandru i inšy kryminalny artykuł, nie źviazany z palitykaj. Maŭlaŭ, nie majučy prava kiravańnia transpartnymi srodkami katehoryi «A», jon raniej nieadnarazova pryciahvaŭsia da adkaznaści pa linii DAI pa č. 1 i č. 2 art. 18.14 Kodeksa Respubliki Biełaruś ab administracyjnych pravaparušeńniach. A ŭ červieni 2022 hoda jon znoŭ sieŭ za rul matacykła «Java 350», na jakim pierasoŭvaŭsia pa vulicach Homiela da momantu jaho zatrymańnia supracoŭnikami DAI.
U vyniku sud pryznaŭ Ajnutdzinava vinavatym i pakaraŭ jaho pazbaŭleńniem voli terminam na dva hady i adzin miesiac va ŭmovach ahulnaha režymu. Taksama jaho pazbavili prava kiravać transpartnymi srodkami na 5 hod.
