Jak ciapier vyhladaje ŭkrainska-biełaruskaja miaža ŭ Rovienskaj vobłaści
Na ŭčastku ŭkrainska-biełaruskaj miažy ŭ Rovienskaj vobłaści pabyvali žurnalisty ŭkrainskaha telekanała «Suśpilnie». Ź ich repartažu možna ŭjavić, jak vyhladaje ŭkrainski bok miažy ciapier. Fartyfikacyjnyja raboty pa ŭmacavańni viaducca tam poŭnym chodam.
Dziaržaŭnuju miažu ź Biełaruśsiu na terytoryi Rovienščyny ŭzmacniajuć dadatkovymi fartyfikacyjnymi zbudavańniami i ŭzvodziać achoŭny płot. Pra heta 16 listapada paviedamiŭ načalnik miascovaj abłasnoj vajskovaj administracyi Vital Koval.
Jakija mienavita zony majuć patrebu va ŭzmacnieńni, vyznačajuć razam z vajskovym kiraŭnictvam. «Štodnia vykarystoŭvajem dla ŭmacavańnia samoj terytoryi niekalki farmataŭ achoŭnych zbudavańniaŭ — heta i supraćtankavyja ravy, i zony miniravańnia. Sumiesna z vajskovym kiraŭnictvam vyznačajem tyja zony, jakija buduć umacavanyja achoŭnymi płatami», — adznačyŭ staršynia AVA.
Achova dziaržaŭnaj miažy ź Biełaruśsiu na Rovienščynie, a heta 218 kiłamietraŭ, pravodzicca pa ŭzmocnienym varyjancie.
«Na ŭkrainska-biełaruskaj miažy ŭsio spakojna. Nijakaj bačnaj pahrozy z boku Biełarusi my nie bačym. Tut panuje spakoj i zasiarodžanaść vajskoŭcaŭ. Siońnia situacyja bolš stabilizavanaja, čym za ŭvieś čas poŭnamaštabnaj vajny Rasii suprać Ukrainy. Heta tyčycca i ŭkamplektavańnia vojskaŭ, i najaŭnaści ŭzbrajeńnia, i asabovaha składu», — dadaŭ Vital Koval.
