Padalak pra padzieńnie rakiety ŭ Polščy: Tolki Rasija niasie adkaznaść za vajnu
Adkul mienavita prylacieła rakieta, jakaja ŭpała ŭ Polščy ŭ aŭtorak viečaram i zabrała dva žyćci, pakul nie viadoma. Jość vialikija sumnievy, što jaje vypuścili rasiejcy: mahčyma, heta była rakieta ŭkrainskaha SPA, jakaja sprabavała pieraškodzić rasijskaj bambardziroŭcy. Adnak adkaznaść za hetuju trahiedyju ŭ lubym vypadku niasie Maskva, zajaviŭ daradca kiraŭnika ofisa ŭkrainskaha prezidenta Michaił Padalak.
«Namier, srodki vykanańnia, ryzyki, eskałacyja — usio heta tolki Rasija. I tut nie moža być nijakich inšych tłumačeńniaŭ lubym ekscesam z rakietami. Tamu što, kali kraina-ahresar nanosić naŭmysny masiravany rakietny ŭdar pa ŭsioj terytoryi vialikaj krainy na jeŭrapiejskim kantyniencie svajoj sastarełaj savieckaj zbrojaj (rakiety kłasa Ch), trahiedyja rana ci pozna adbyvajecca i na terytoryjach inšych dziaržaŭ», — zajaviŭ Padalak.
«Nie baču ni najmienšaha sensu adychodzić ad hetaj prostaj łohiki: tolki Rasija svaimi rakietnymi napadami vinavataja ŭ pahrozach i ekscesach u inšych krainach», — dadaŭ jon.
Padalak zaklikaŭ zachodnija krainy narešcie «zakryć nieba» nad Ukrainaj (heta značyć uvieści zabaronu na lubyja paloty nad terytoryjaj krainy), pra što ŭkraincy prosiać z pačatku vajny.
«Nie treba šukać apraŭdańniaŭ i adkładać klučavyja rašeńni. Jeŭropie pryjšoŭ čas zakryć nieba nad Ukrainaj. U tym liku i dla jaje ŭłasnaj biaśpieki», — upeŭnieny Padalak.
