Na vajnie va Ukrainie zahinuŭ hramadzianin Zambii, jaki siadzieŭ u rasijskaj turmie
Ministerstva zamiežnych spraŭ Zambii zajaviła, što na vajnie va Ukrainie zahinuŭ hramadzianin hetaj krainy, jaki raniej adbyvaŭ turemny termin u adnoj z turmaŭ na ŭskrainach Maskvy. Pa źviestkach kiraŭnika zambijskaha źniešniepalityčnaha viedamstva, 23-hadovy student Lemiechani Natan Ńjirenda zahinuŭ «na poli boju» va Ukrainie 22 vieraśnia, piša Bi-bi-si.
Cieła afrykanca znachodzicca ŭ Rastovie i nieŭzabavie budzie adpraŭlena ŭ Zambiju. Kopiju zajavy kiraŭnika MZS Zambii Stenli Kakuby apublikavaŭ u svaim tvitary žurnalist Samira Saŭłani.
MZS Zambii nie ŭdakładniaje, za jakija mienavita złačynstvy hramadzianin hetaj krainy byŭ asudžany, ale paviedamlaje, što ŭ krasaviku 2020 hoda jon atrymaŭ 9,5 hadoŭ źniavoleńnia.
Da hetaha Ńjirenda vyvučaŭ prajektavańnie jadziernych ustanovak u Maskoŭskim inžynierna-fizičnym instytucie (MIFI).
«U suviazi z hetym vielmi sumnym raźvićciom padziej urad Zambii zapatrabavaŭ ad rasijskich uładaŭ terminova dać infarmacyju pra abstaviny, pry jakich zambijski hramadzianin, jaki adbyvaŭ turemny termin u Maskvie, moh być zavierbavany na vajnu va Ukrainie i paśla hetaha zahinuŭ», — skazana ŭ zajavie Kakuby.
Možna mierkavać, što zambijski hramadzianin byŭ adnym sa źniavolenych, zavierbavanych u rasijskich kałonijach stvaralnikam PVK «Vahnier» Jaŭhienam Pryhožynym.
