Łukašenka skazaŭ, što ŭ Biełarusi vyrablajuć rakiety. Jakija?
Chutčej za ŭsio, havorka pra rakiety dla RSZV «Pałaniez» i ZRK «Buk».
Vyprabavańni doślednych uzoraŭ zienitnych kiravanych rakiet 9M318 raspracoŭki biełaruskaha NVTAA «OKB TSP», pryznačanych dla madernizavanaha rakietnaha kompleksu «Buk-MB2» («Buk-MB3K»), luty 2020 hoda. Fota: Dziaržkamvajenpram
U Biełarusi, zhodna z adkrytymi danymi, vyrablajecca dva vidy rakiet: dla biełaruskaj sistemy załpavaha ahniu «Pałaniez» (vytvorca — «Zavod dakładnaj miechaniki») i zienitna-rakietnaha kompleksu «Buk» (vytvorca — NVTAA «OKB TSP»).
«Pałaniezy»
Rakieta dla «Pałaniezaŭ». Fota: Zavod dakładnaj miechaniki
Biełaruś pačała vyrablać takija rakiety adnosna niadaŭna. Raniej rakiety dla «Pałaniezaŭ» pastaŭlaŭ Kitaj, ale Łukašenka doŭhi čas chacieŭ stvaryć ułasny bojeprypas dla hetaha kompleksu. Upieršyniu kanceptualny ŭzor takoj rakiety prezientavali na vystavie MILEX-2017.
Na ciapier praviedzienyja vyprabavańni takich rakiet, ale ŭ «sieryi» ich dahetul niama. Miarkujučy pa ŭsim, jana pavinna mieć dalokaść kala 300 kiłamietraŭ pry masie traciłu ŭ joj nie mienšaj za 130 kiłahram, ale moža być namnoha bolšaj.
Vyrablać ich budzie «Zavod dakładnaj miechaniki» ŭ Stańkavie. Pra nazvu takich rakiet pakul dakładna nieviadoma, jak i pra ich vynikovyja charaktarystyki, ale viadoma, što pracy viaducca ŭžo bolš za piać hadoŭ, i vyniki jość.
Vyprabavańni «Pałaniezaŭ». Videa: Zavod dakładnaj miechaniki
Pra namier kupić biełaruskija «Pałaniezy» jak supraćvahu HIMARS rasijanie zajavili ŭ vieraśni 2022 hoda. Amierykanskija analityki tady kazali pra toje, što mahčymy varyjant navat sumiesnaj rasijska-biełaruskaj vytvorčaści.
9M318 dla ZRK «Buk»
Rakiety 9M318 na vystavie MILEX-2019. Fota: wikimedia.org
Rakiety 9M318 upieršyniu prezientavali ŭ 2019 hodzie. Vyrablaje ich pryvatnaje pradpryjemstva NVTAA «OKB TSP». Jany sabranyja ź biełaruskich kamplektujučych padčas vytvorčaści čarhovaj biełaruskaj madernizacyi ZRK «Buk».
Pieršyja vyprabavańni hetaj rakiety prajšli ŭ 2020 hodzie, a madernizavany «Buk-MBK2» z hetymi rakietami na borcie prezientavali na vystavie ADEX-2022 u Baku ŭ vieraśni 2022 hoda. Zhodna z apisańniem raspracoŭnikaŭ, kompleks «pryznačany dla paražeńnia ŭsich typaŭ aeradynamičnych celaŭ va ŭmovach intensiŭnaha radyjoelektronnaha procidziejańnia praciŭnika, a taksama dla baraćby z taktyčnymi balistyčnymi rakietami i elemientami vysokadakładnaj zbroi, paražeńnia nadvodnych i naziemnych celaŭ».
9M318 maje zajaŭlenuju dalokaść stralby ad 3 da 70 kiłamietraŭ i moža traplać u pavietranuju cel, jakaja lacić na vyšyni ad 15 mietraŭ da 25 kiłamietraŭ z chutkaściu da 1350 m/s. Masa rakiety składaje 815 kiłahramaŭ, jana abstalavanaja aktyŭnaj hałoŭkaj samanaviadzieńnia i moža traplać u cel z dakładnaściu da 10 santymietraŭ.
