Kitaj choča prymusić małpaŭ razmnažacca ŭ kosmasie
Kitajskaja akademija navuk płanuje adpravić na ŭłasnuju kaśmičnuju stancyju «Ciańhun» myšej i makak i zładzić ekśpierymient pa ich razmnažeńni. Ale pakul niezrazumieła, ci zmohuć žyvioły sparvacca ŭ stanie biazvažkaści, piša South China Morning Post.
Fota: vecteezy.com
Ciapier na kaśmičnaj stancyi jość bijaboksy dla vodaraściaŭ, rybak i ślimakoŭ. Adsieki pryjdziecca pašyryć, kab u ich źmiaścilisia bolš bujnyja žyvioły. Jašče adna prablema — zachoŭvańnie kormu dla małpaŭ i ŭtylizacyja reštak ich žyćciadziejnaści.
Taksama nieviadoma, jak makaki buduć pavodzić siabie ŭ kosmasie. U ciesnych kletkach na ziamli jany adčuvajuć siabie niekamfortna: pačynajuć vyryvać poŭść, admaŭlacca ad ježy abo aktyŭnaści.
Akramia taho, małpaŭ moža mocna spałochać palot na rakiecie. «Na ziamli paniku małpy možna supakoić cackami, muzykaj ci prosta kampanijaj surodzičaŭ. Jak pakłapacicca pra ščaście i kamfort małpy ŭ kosmasie — novy vyklik dla astranaŭtaŭ», — skazaŭ adzin z navukoŭcaŭ, jaki pažadaŭ zastacca ananimnym.
Ci mohuć prymaty, u pryvatnaści ludzi, razmnažacca ci prosta zajmacca seksam u biazvažkaści, dakładna nieviadoma. Pavodle źviestak NASA, astranaŭty ŭ intymnuju suviaź u kosmasie pakul što ni razu nie ŭstupali.
Pa słovach repraduktyŭnaha fizijołaha Adama Uotkinsa, zaniacca seksam za miežami Ziamli moža być značna składaniej, čym zdajecca. Pa-pieršaje, z-za biazvažkaści ciažka ŭstupić adno z adnym u kantakt. Pa-druhoje, z-za panižanaha cisku składana padtrymlivać erekcyju. Pa-treciaje, na kaśmičnych stancyjach niama pakojaŭ dla adasableńnia.
Savieckija navukoŭcy niekali ŭžo sprabavali pastavić ekśpierymient pa razmnažeńni myšej u kosmasie. Niekalki hryzunoŭ zmahli pieraadoleć usie ciažkaści i sparycca. U niekatorych samak navat źjavilisia prykmiety ciažarnaści, ale ŭ vyniku nivodnaja ź ich nikoha nie naradziła, viarnuŭšysia na Ziamlu.
