Kłub u Kastramie padpaliŭ vajskoviec, jaki viarnuŭsia z frontu va Ukrainie
Rasijskija ŭłady zatrymali čałavieka, jaki, jak miarkujecca, vinavaty ŭ pažary, što ŭnačy adbyŭsia ŭ kłubie «Palihon» u Kastramie. U vyniku pažaru zahinuli 15 čałaviek. A mierkavany vinavaty ŭ im, 23-hadovy Stanisłaŭ Ionkin, u žniŭni viarnuŭsia z vajny va Ukrainie, daviedałasia vydańnie Baza.
Pavodle Baza, Ionkin ź inšymi vajskoŭcami padčas znachodžańnia na froncie vioz bojeprypasy, kali pačaŭsia abstreł. Jaho vykinuła z mašyny i jon złamaŭ nahu. Paśla hetaha Ionkina adpravili ŭ špital u Astrachanskaj vobłaści, a zatym jon viarnuŭsia na radzimu ŭ Kastramskuju vobłaść.
Doŭhi čas Ionkin znachodziŭsia na balničnym i ŭ pačatku listapada adpraviŭsia znoŭ u vajskovuju čaść dla prachodžańnia miedkamisii. Učora ŭviečary jon stelefanavaŭsia sa svajakami i skazaŭ, što ŭ jaho ŭsio dobra. A paśla razmovy ź imi adpraviŭsia ŭ načny kłub «Palihon», dzie ŭstupiŭ u bojku i zładziŭ fiejervierk ź sihnalnaj rakietnicy, jaki pryvioŭ da pažaru i śmierci 15 čałaviek.
Kłub «Palihon» byŭ, darečy, źviazany z uładami. Miascovyja ŚMI paviedamlajuć, što jaho ŭładalnikam źjaŭlajecca deputat abłasnoj Dumy ad «Adzinaj Rasii», uradženiec Azierbajdžana Ichtyjar Iłdyr-ahły Mirzojeŭ.
