1928 hod. Navahradskaje vajavodstva...
Historyk Alaksandr Paškievič u praciah dyskusii: Ci hałasavaŭ chto kali za biełaruskija nacyjanalnyja partyi?
Historyk Alaksandr Paškievič u praciah dyskusii: ci hałasavaŭ chto kali za biełaruskija nacyjanalnyja partyi?
Niaredka možna pačuć, što za biełaruskija nacyjanalnyja partyi nikoli ŭ historyi nichto masava nie hałasavaŭ. Dyk voś, 1928 hod. Navahradskaje vajavodstva. U śpisach jość Biełaruski sialanska‑rabotnicki śpis «Zmahańnie» (№ 39). Vybary 4 sakavika. U Navahradskim paviecie za «Zmahańnie» addadziena 30772 (68,9%) hałasoŭ, u Słonimskim — 18 917 (63,8%) hałasoŭ, u Baranavickim 15 779 (34,6%) hałasoŭ. I heta pry tym, što vybary — niedemakratyčnyja, što ŭsia dziaržaŭnaja mašyna nakiravanaja na padtrymku praŭradavaha śpisu Biespartyjnaha błoka supracoŭnictva z uradam (niešta padobnaje na siońniašniuju «Adzinuju Rasieju» ŭ našaha ŭschodniaha susieda). Tut Vy taksama skažacie, što heta ničoha nie značyć? Nie viedaju, ja b tak nie skazaŭ.
A voś Lidskaja vybarčaja akruha, pieravažna katalicki ŭ bolšaści pavietaŭ rehijon, nasielnictva, naturalna, pałanizavanaje, hałasuje za polskija partyi, da taho ž palaki začyścili ŭsio jak maje być, źniaŭšy z vybarčaj honki śpis «Zmahańnia», a taksama śpis Błoka nacyjanalnych mienšaściaŭ, pa jakim źbiralisia bałatavacca pamiarkoŭnyja biełaruskija dziejačy na čale ź biełaruskimi chadekami — samaj mocnaj nacyjanalnaj partyjaj taho času. Zastajecca tolki adzin surjozny biełaruski śpis — pamiarkoŭny i vonkava łajalny da palakaŭ na čale ź Jankam Stankievičam — i ŭ zbolšaha pravasłaŭnym Maładziečanskim paviecie jon nabiraje 13 292 hałasy (46,6%). I ŭsio pry toj ža, naturalna, niedemakratyčnaści vybaraŭ, pry «administracyjnym resursie» na karyść BBSU.
Ja ŭžo maŭču pra 43,2% hałasoŭ za biełaruski śpis (praŭda, sumiesny z habrejami, ale na pieršych troch miescach u im stajali biełarusy) u Dzisienskim paviecie, pra 40,3% u Pastaŭskim paviecie, pra 36,7% u Brasłaŭskim.
...Pajdu dapisvać vialiki artykuł na hetuju temu, pryśviečany ŭsioj terytoryi Zachodniaj Biełarusi. Kali kamu cikava, čytajcie ŭ bližejšy čas.
