Baćka Ksienii Łuckinaj: «Sa zdaroŭjem u dački ŭsio kiepska»
Baćka źniavolenaj žurnalistki raspavioŭ «Narodnaj Voli», što jaho dačku pieravieźli ź Minska ŭ SIZA Homiela.
Nahadajem, što 28 vieraśnia Minski haradski sud prysudziŭ žurnalistcy 8 hadoŭ źniavoleńnia. Ksieniju, jakaja ŭ 2020 hodzie pracavała ŭ Biełteleradyjokampanii, abvinavačvali ŭ zmovie z metaj zachopu dziaržaŭnaj ułady niekanstytucyjnym šlacham.
Za čas znachodžańnia za kratami ŭ Ksienii Łuckinaj mocna pahoršyłasia zdaroŭje: abvastryłasia branchijalnaja astma, pavialičvajecca puchlina ŭ mozhu — u 2014 hodzie žančynie zrabili apieracyju i vydalili dźvie puchliny ŭ hałavie.
— Paśla vyniasieńnia prysudu mnie dazvolili spatkańnie z Ksienijaj u SIZA na Vaładarskaha, — kaža Aleh Łuckin, baćka žurnalistki. — A 25 kastryčnika jaje pieravieźli ź Minska ŭ SIZA Homiela, dzie jana i budzie čakać razhladu apielacyi ŭ Viarchoŭnym sudzie.
— Jak zaraz samaadčuvańnie dački?
— Sa zdaroŭjem usio kiepska. Chvaroba nie adstupaje, tamu ŭ jaje pastajannyja hałaŭnyja boli, trasucca ruki i nohi.
Jašče kali była ŭ Minsku ŭ SIZA, Ksienii abiacali dadatkovaje miedycynskaje abśledavańnie, ale abiacańni tak słovami i zastalisia. Skazali: mahčyma, u Homieli zrobiać MRT. Adnym słovam, moža, zrobiać, a moža, i nie zrobiać…
