Łukašenka: Ukraincam niama ŭ čym papraknuć Biełaruś
Biełaruś robić usio, «kab spynić krovapralićcie» va Ukrainie, i «ni dla kaho my nie byli krynicaj pahrozy». Pra heta zajaviŭ Alaksandr Łukašenka, prymajučy davierčyja hramaty pasłoŭ zamiežnych krain, pieradaje BIEŁTA.
Miru va Ukrainie možna dasiahnuć na praciahu niekalkich dzion, ličyć Łukašenka. «Kali jeŭrapiejcy ščyra hetaha žadajuć, miru možna dasiahnuć na praciahu niekalkich dzion», — miarkuje jon.
U hety ž čas, pavodle Łukašenki, Biełaruś, z terytoryi jakoj Rasija napała na Ukrainu, «niaźmienna vystupała i vystupaje ź mirnymi inicyjatyvami na mižnarodnaj arenie».
«Straciŭšy kožnaha treciaha ŭ časy fašysckaha hienacydu, biełarusy, jak ni adna inšaja nacyja ŭ śviecie, vysoka ceniać čałaviečaje žyćcio. Kožnaje čałaviečaje žyćcio! — adznačyŭ Łukašenka. — U tym liku pa hetaj pryčynie i raniej, i siońnia, kali pobač z nami, va Ukrainie, pałaje vajenny kanflikt, niaźmienna vystupali i vystupajem ź mirnymi inicyjatyvami na mižnarodnaj arenie. My ličym kanflikt pamiž brackimi narodami vielizarnaj trahiedyjaj.
Jon — pramoje śledstva stratehičnych intryh i najvialikšaj duraści, pierš za ŭsio zachodnich palitykaŭ».
Łukašenka znoŭ źvinavaciŭ u vajnie Zachad, a nie Rasiju.
«Jaki raz zajaŭlaju pra heta i papiaredžvaju jeŭrapiejcaŭ: adumajciesia i rabicie ŭsio dla taho, kab na hetaj ziamli byŭ mir», — skazaŭ Łukašenka.
Jon kaža, što Biełaruś «sumlenna sprabavała ŭsimi siłami nie dapuścić hetaha varjactva».
«I nie treba nas siońnia paprakać u suahresii ci jašče ŭ niečym. My byli, jość i budziem razam z našaj Rasijaj. U nas z Rasijaj sajuz bolš ciesny, čym błok NATA. Što vy ad nas chočacie? Ale ŭ toj ža čas my havorym pra toje, što my nie budziem vajavać va Ukrainie. Davajcie mirna supracoŭničać. Biełaruś ukraincam niama ŭ čym papraknuć. Nas, biełarusaŭ, niama ŭ čym papraknuć. Nie my pačali kanfliktavać z Ukrainaj.
Heta jany raniej zachodnich dziaržaŭ i Amieryki zakryli nieba dla pralotaŭ našych samalotaŭ i abjavili ekanamičnuju błakadu Biełarusi, — skazaŭ Łukašenka. — Čaho vy ciapier paryciesia i ad nas niešta patrabujecie? My śviata vykonvajem našy damoŭlenaści z Rasijaj. I pra heta da kanfliktu viedali ŭsie ŭ NATA, i tym bolš u Amierycy».