New York Times: Rasijskaje kamandavańnie chacieła adstupić z Chiersona, Pucin nie dazvoliŭ
Prezident Rasii apošnija tydni ŭziaŭ na siabie kamandavańnie vojskami na Ukrainie, śćviardžaje New York Times, spasyłajučysia na krynicy ŭ amierykanskaj vyviedcy.
Paviedamlajecca, što vychad z Chiersona dazvoliŭ by rasijskim vajskoŭcam arhanizavana adstupić za Dniapro, zachavaŭšy techniku i asabovy skład. Adnak takoje adstupleńnie stała b jašče adnym źnievažalnym publičnym pryznańniem parazy ŭ vajnie i pryniesła b Ukrainie druhuju bujnuju pieramohu za adzin miesiac paśla paśpiachovaha nastupleńnie na Charkaŭščynie.
Chierson byŭ pieršym bujnym ukrainskim horadam, zachoplenym u lutym, i zastajecca adzinym abłasnym centram, jaki znachodzicca pad kantrolem Maskvy. Jaho vyzvaleńnie stała b vialikim dasiahnieńniem dla Uładzimira Zialenskaha. Vydańnie źviazvaje rašeńnie ab častkovaj mabilizacyi ŭ Rasii z tym, što Pucin zasiarodžany na pieramozie luboj canoj, a rasijskaje vojska źbiantežanaje.
Krynicy New York Times, znajomyja z sakretnymi raźvieddanymi, zajavili, što Pucin advodzić sabie važniejšuju rolu ŭ vajnie — u tym liku kaža vajskoŭcam, što stratehičnyja rašeńni na miescach pavinny prymacca asabista im.
Chacia Pucin pryniaŭ niekatoryja rekamiendacyi vajennaha kamandavańnia, u tym liku mabilizacyju cyvilnaha nasielnictva, jaho ŭdzieł stvaryŭ napružanaść, zajavili krynicy vydańnia. Pa ich słovach, niazhoda Pucina z advodam vojskaŭ z Chiersona pryviała da źnižeńnia maralnaha duchu siarod rasijskich vajskoŭcaŭ, jakija ŭ asnoŭnym adrezanyja ad linij zabieśpiačeńnia (paśla vyvadu z ładu Antonaŭskaha mosta). Jany ličać, što mohuć zastacca ŭ vielmi ciažkim stanoviščy ŭ vypadku nastupu ŭkrainskich vojskaŭ.
