U Piekinie adkryli restaran biełaruskaj kuchni
Pra adkryćcio ŭ Piekinie restarana «Minsk», pieršaj u Kitai vysokaj ŭstanovy biełaruskaj kuchni, paviedamiła pres-słužba pasolstva Biełarusi ŭ Kitai.
Kiraŭnik biełaruskaha dyppradstaŭnictva Juryj Siańko ŭdzielničaŭ 22 vieraśnia va ŭračystaj cyrymonii adkryćcia restarana. U svajoj pramovie jon nahadaŭ, što sioleta Biełaruś i Kitaj adznačajuć 30-hodździe ŭstanaŭleńnia dypadnosin, a z 1 lipienia pa 1 kastryčnika ŭ Kitai prachodziać Dni kultury Biełarusi.
U pasolstvie ličać, što kitajcy zmohuć lepš zrazumieć tradycyi i asablivaści biełaruskaj kultury, kali pasprabujuć nacyjanalnuju kuchniu. Akramia taho, u pasolstvie majuć namier «vykarystać patencyjał kulinarnaj dypłamatyi» dla zbližeńnia narodaŭ.
Ustanova znachodzicca ŭ adnym z bujnych biznes-centraŭ Piekinskaj zony technika-ekanamičnaha raźvićcia. Jakija mienavita stravy buduć u joj padavać — nie ŭdakładniajecca.
Interjer restarana davoli strymany, hałoŭny jaho akcent — nacyjanalny biełaruski arnamient. Taksama źviartaje ŭvahu, što ŭ afarmleńni šmat zialonych raślin i dreva. A stały sierviravanyja savieckimi «hranionymi» šklankami.
i b-č-b z vyšyvankaj, jak ja chaču...