Časovuju pavieranuju ŭ spravach ES u Biełarusi zatrymali paśla suda nad palitviaźniami i kala 2 hadzin utrymlivali ŭ milicyi
Časovuju pavieranuju ŭ spravach Jeŭrapiejskaha sajuza ŭ Biełarusi Evielinu Šulc zatrymali paśla zakančeńnia suda pa «spravie anarchistaŭ» i pravaabaroncy Marfy Rabkovaj i dastavili va UUS Frunzienskaha rajona Minska, paviedamlaje «Pozirk».
Evielina Šulc. Fota AAN
Jaje ŭtrymlivali tam kala dźviuch hadzin, paviedamiła BPN krynica ŭ dypłamatyčnych kołach ES.
Pra toje, što zdaryłasia, byli apavieščanyja kiraŭnik pradstaŭnictva ES u Minsku Dyrk Šubiel (u siaredzinie 2021 hoda pa patrabavańni biełaruskich uładaŭ pakinuŭ krainu i pracuje z-za miažy) i kiraŭnictva ES u Brusieli.
Inšych jeŭrapiejskich dypłamataŭ, jakija prybyli 6 vieraśnia na vyniasieńnie pryhavoru ŭ Minski haradski sud, nie zatrymlivali.
Aficyjnaj reakcyi na toje, što zdaryłasia, ad ES i jaho biełaruskaha pradstaŭnictva pakul niama. Nieviadoma taksama, ci składaŭsia na dypłamatku ŭ milicyi pratakoł.
Pavodle Vienskaj kanviencyi ab dypłamatyčnych adnosinach, dypłamaty vałodajuć imunitetam.
Pavodle infarmacyi pravaabaroncaŭ, paśla vyniasieńnia prysudu kala budynka suda byli zatrymanyja i dastaŭlenyja ŭ Frunzienski RUUS taksama niekalki svajakoŭ asudžanych, pravaabaronca Anastasija Łojka i inšyja hramadzianie — usiaho nie mienš za 13 čałaviek. Dvaich — Nastu Łojku i Daniiła Krašeŭskaha — buduć sudzić, astatnich adpuścili.
Taksama viadoma, što da zatrymanych u Frunzienski RUUS pryjazdžaŭ prapahandyst Ryhor Azaronak. Jon chadziŭ ź mikrafonam i nastojliva patrabavaŭ ad zatrymanych dać kamientar. Najbolš «dastałasia» ad jaho časovaj pavieranaj u spravach ES u Biełarusi Evielinie Šulc — Azaronak «nasiadaŭ» na jaje z pytańniami bolš za ŭsich
