U Lachavickim rajonie pracavała «miasnaja mafija», jakaja «chacieła padmiać pad siabie rajon»
Pra padrabiaznaści złačynnaj schiemy raskazali ŭ efiry telekanała «ANT». Pavodle hetaj infarmacyi, jaje vykanaŭcy šmat hadoŭ pracavali «pa-čornamu»: sychodzili ad padatkaŭ i nielehalna handlavali.
Fota ilustracyjnaje
U telesiužecie pakazvajuć kadry, na jakich mužčyna dvojčy stralaje sa strelby praktyčna va ŭpor pa byku. Paśla druhoha strełu byk hinie.
Pavodle infarmacyi aŭtaraŭ siužetu, strałok — syn 47-hadovaha kiraŭnika TAA «Miasakambinat Lachavičy». Pa viersii śledstva, hety čałaviek arhanizavaŭ praz svajo pradpryjemstva kryminalnuju schiemu pa niezakonnaj skupcy bujnoj rahataj žyvioły ŭ sielhaspradpryjemstvaŭ rehijona i nastupnaj pastaŭcy miasa ŭ Rasiju.
Da 2016 hoda miasnyja fury hnali «pa-čornamu», a potym vyrašyli lehalizavać niezakonny biznes.
«Jany davali pazyki, kuplali niekatoruju techniku, nabyvali dla sielhaspradpryjemstvaŭ. Z adnaho boku, heta vyhladała niadrenna — dapamoha sielhaspradpryjemstvam. Ź inšaha boku, sielhaspradpryjemstvy adrazu stanavilisia daŭžnikami hetaha pradpryjemstva. Heta była harantavanaja syravinnaja zona, harantavanaja pastaŭka syraviny na pradpryjemstvy. Chočaš ty, nie chočaš — ty tudy pavinien budzieš pastaŭlać žyviołu», — adznačyŭ pieršy namieśnik staršyni Lachavickaha rajvykankama Vasil Pyžyk.
U vyniku faktyčna ŭ kabale ŭ zasnavalnika miasakambinata apynulisia amal usie asnoŭnyja haspadarki vobłaści. Tolki za 2020 hod i pieršaje paŭhodździe 2021-ha na bojniu pastavili amal 30 tysiač hałoŭ. Pa dakumientach, tut vyrablali 750 ton za hod, a pa fakcie — u šeść razoŭ bolš. Abjomy chavali, bo bolšaja častka miasa išła «naleva».
Arhanizatary schiemy stvaryli padkantrolnyja struktury ŭ Smalensku, kudy pastaŭlali «niekandycyju» pa zanižanych koštach, kab ekanomić na padatkach. U vyniku ich dziejańniaŭ biudžet nie daličyŭsia kala 3 młn biełaruskich rubloŭ.
Na karotkim pavadku ŭ padazravanaha byli i asobnyja pradstaŭniki miascovaj ułady, jakija jaho «pakryvali» — za heta raspačata 14 kryminalnych spraŭ.
Niehatyŭny ŭpłyŭ usio heta akazvała i na ekałohiju. Lachavickaja bojnia, intensiŭna pracujučy, skidvała techničnuju vadu z cechaŭ prosta ŭ najbližejšuju raku. Akramia hetaha, miasakambinat chavaŭ adychody vytvorčaści na vornych ziemlach.
Zasnavalnik miasakambinata znachodzicca pad vartaj, rasśledavańnie kryminalnaj spravy praciahvajecca. Ustanoŭlenyja asnoŭnyja ŭdzielniki złačynnaj schiemy: ad svajakoŭ «miaśnika» da słužbovych asob rajona. Dziejnaść AAT «Miasakambinat Lachavičy» spynienaja, pradpryjemstva znachodzicca ŭ stadyi likvidacyi, na jaho aktyvy nakładzieny aryšt.
