Ukraincy pašyryli płacdarm pad Chiersonam, atakujuć pad Zaparožžam
Udary ŭkrainskaj armii pa pantonnych pierapravach cieraz Dniapro stali štodzionnymi. Rasijskija resursy pryznajuć, što ŭkraincy pašyrajuć stratehična važny płacdarm na levym bierazie Inhulca kala Andrejeŭki i Łazavoha. 4 vieraśnia rasijskija vojski taksama adstupili z pht Vysakapolle.
Praca rakietnaj sistemy załpavaha ahniu. Fota 53-j asobnaj miechanizavanaj bryhady imia kniazia Uładzimira Manamacha USU
Ukrainskaje kiraŭnictva ŭstrymlivajecca ad zajaŭ pra vyzvaleńnie terytoryj, kab nie stvarać u hramadstvie zavyšanych čakańniaŭ. Adnak paviedamleńni rasijskich resursaŭ pakazvajuć, što ŭkrainski kontrnastup praciahvajecca. Pryčym, akramia aktyŭnych dziejańniaŭ na chiersonskim kirunku, ukraincy kancentrujuć siły ŭ rajonie Iziuma i Barvienkava na poŭdzień ad Charkava, i robiać vyłazki pad Zaparožžam.
«Na praciahu 3 vieraśnia Uzbrojenym siłam Ukrainy ŭdałosia całkam zaniać siało Błahadataŭka, — piša rasijski šavinistyčny telehram-kanał «Rybaŕ». — Vierahodniej za ŭsio, u rajonie Andrejeŭki była častkova adnoŭlenaja jak minimum adna pantonnaja pieraprava [cieraź Inhulec]: da siaredziny dnia tudy kursiravali hruzaviki z druzam i hruntam, jakija nasypali ziemlany nasyp».
Karta frontu kala Suchoha Staŭka pa stanie na 3 vieraśnia, zhodna z «Rybariem»
Učora ž u chiersonskich čatach źjavilisia videa rasijskaha ZPRK «Pancyr», źniščanaha ŭ Aleškach — heta levabiarežniaja častka Chiersonskaj vobłaści.
Ranicaj 4 vieraśnia byŭ uźniaty ściah Ukrainy nad bolnicaj u Vysakapolli Bierysłaŭskaha rajona Chiersonskaj vobłaści. Heta pasiołak haradskoha typu z 4-tysiačnym nasielnictvam, stratehična važny punkt. Bai za jaho išli z 29 žniŭnia, a pad akupacyjaj jon byŭ z 16 sakavika.
Adstupleńnie rasijskich desantnikaŭ z Vysakapolla paćvierdzili rasijskija krynicy.
Fota ŭstalavańnia ŭkrainskaha ściaha nad Vysokapolskaj balnicaj
UNIAN piša, što ŭkrainskija vajskoŭcy vyzvalili ad akupantaŭ Aziornaje ŭ Danieckaj vobłaści, farsiravaŭšy raku Sievierski Daniec. Heta nievialikaja vioska niepadalok ad Sievierska.
3 vieraśnia źjavilisia videa novaha ŭdaru ŭkrainskaj dalnabojnaj artyleryi pa aeradromie Mielitopala, a ŭ Danieckaj vobłaści ŭkraincy źbili rasijski viertalot Ka-52.
Rasijskija kanały pišuć, što, pačynajučy z 31 žniŭnia, ukraincy pramacvajuć abaronu rasijan taksama pad Pałahami Zaparožskaj vobłaści.
Rasijskija resursy zakłapočanyja taksama situacyjaj na poŭdzień ad Charkava. Mnohija rasijskija błohiery ličać, što nastup pad Chiersonam maje tolki padstavić rasijskija siły pad udar na nieabaronienych pierapravach cieraz Dniapro, a hałoŭny ŭdar ukraincy rychtujuć pad Iziumam i Barvienkavam.
Na fonie novych pravałaŭ na froncie ŭ Rasii pačynajuć šukać vinavatych. Hetak, množacca narakańni na adstałaść uzbrajeńniaŭ.
Tak, rasijski šavinistyčny telehram-kanał «Vojennyj ośviedomitiel» piša: «Sacsietki poŭnyja videarolikaŭ, na jakich Uzbrojenyja siły Ukrainy pierasoŭvajucca vializnymi kałonami pa darohach ahulnaha karystańnia. Čamu? Tamu što niama ad kaho chavać svaje pieramiaščeńni: Uzbrojenyja siły RF majuć katastrafičny deficyt jak raźviedvalnych BPŁA, tak i vysokadakładnaha ŭzbrajeńnia. U vypadku ź pieršym heta žachlivy niedachop BPŁA apieratyŭna-taktyčnaha ŭzroŭniu, takich, jak «Aryjon» abo «Farpost», jakija dazvalali b hladzieć u tyły ŭkrainskich vajskoŭcaŭ i navodzić vysokadakładnaje ŭzbrajeńnie, adnak tut uspłyvaje inšaja prablema — niedachop karektavanych bombaŭ i rakiet u rasijskaj avijacyi, jakaja na hety momant nie moža paražać takija čarody techniki biez ryzyki dla piłotaŭ, FABami takija celi nie źniščyć».
