Ahulnaja dyktoŭka projdzie siońnia tolki ŭ anłajn-farmacie
Pa techničnych pryčynach «Ahulnaja dyktoŭka» adbudziecca siońnia a 15:00 tolki ŭ anłajn-farmacie. Mierapryjemstva ŭ Lidbeer Dvor admieniena!
Spasyłka na tranślacyju źjavicca na sajcie za paŭhadziny da pačatku. Arhanizatary vybačajucca va ŭdzielnikaŭ, jakija płanavali dałučycca da nas afłajn.
Takim čynam 3 vieraśnia a 15-j hadzinie na YouTube-kanale pačniecca tranślacyja. Da pryznačanaha času pad rukoj treba mieć tolki ručku i list farmatu A4. Abmiežavańniaŭ pa ŭzroście, hieahrafii i navat uzroŭni viedańnia movy dla ŭdzielnikaŭ niama, paviedamlajuć arhanizatary, dla dyktoŭki arhanizatary vybrali tekst siaredniaj składanaści, kab pakazać adnačasova i bahaćcie našaj movy, i jaje mieładyčnuju pryhažość.
— Sioleta my vyrašyli nie prosta vykazać luboŭ da rodnaj movy praz adkrytuju dyktoŭku, ale i nabyć dla Biełarusi kaštoŭny materyjalny skarb. Za kožnaha ŭdzielnika, jaki dašle svaju pracu na pravierku, AAT «Lidskaje piva» pieraličyć piać rubloŭ na nabyćcio novaha ekspanata dla DU «Lidski historyka-mastacki muziej», dla jaho viadomaha na ŭsiu krainu filijała — Lidskaha zamka, — kazali raniej u kampanii.
Adpravić svaju pracu na pravierku možna praz asabisty kabiniet na sajcie, zrabić heta treba 3 vieraśnia da 19:00. Vystaŭlać adznaki buduć prafiesijnyja fiłołahi, svaje vyniki z kamientaryjami admysłoŭcaŭ možna budzie ŭbačyć praz 3—4 dni taksama ŭ asabistym kabiniecie.
Vydatniki, jakija napišuć dyktoŭku na 8, 9 ci 10 bałaŭ, atrymajuć zaprašalnyja bilety ŭ Muziej lidskaha brovara, jaki adkryŭsia ŭ Lidzie hetaj viasnoj. Na čatyroch pavierchach histaryčnaha budynka sabranyja tysiačy ekspanataŭ, u tym liku interaktyŭnyja, pryśviečanyja historyi słavutaha piŭzavoda i jaho zasnavalnika Nosiela Pupko.
