U Arhiencinie pasprabavali zastrelić vice-prezidenta. Ale pistalet daŭ asiečku
Uviečary 1 vieraśnia nieviadomy mužčyna nakiravaŭ pistalet u tvar vice-prezidenta Arhienciny Kryściny Fiernandes de Kiršner, adnak streł zrobleny nie byŭ. Napadnika zatrymali.
Prezident Arhienciny Albierta Fiernandes nazvaŭ sprobaj zabojstva dziejańnia mužčyny, jaki nakiravaŭ pistalet na vice-prezidentku krainy Kryścinu Fiernandes de Kiršnier. Pra heta palityk zajaviŭ u śpiecyjalnym zvarocie, zdradžvaje La Nation.
«Siońnia kala 21:00 mužčyna ździejśniŭ zamach na vice-prezidentku i dvojčy prezidentku krainy Kryścinu Fiernandes de Kiršnier. Heta samaja ciažkaja padzieja z momantu adnaŭleńnia demakratyi [u 1983 hodzie]», — skazaŭ jon.
Pa jaho słovach, vice-prezidentka zastałasia žyvaja «pa niejkaj nievierahodnaj pryčynie», pakolki zaradžanaja zbroja nie zrabiła streł, niahledziačy na spuščany kurok. Akramia taho, Fiernandes abviaściŭ piatnicu vychadnym dniom dla praviadzieńnia maršaŭ u padtrymku vice-prezidentki.
Incydent adbyŭsia ŭ čaćvier viečaram, kali Fiernandes de Kiršnier vychodziła z aŭtamabila la svajho doma. Na kadrach, pakazanych u efiry telekanała, vidać, jak mužčyna, što stajaŭ u natoŭpie. padniaŭ pistalet i nakiravaŭ jaho na vice-prezidentku pierad samym jaje tvaram. Napadnika apieratyŭna zatrymali, im akazaŭsia 35-hadovy hramadzianin Brazilii. Ministr nacyjanalnaj biaśpieki Anibał Fiernandes paćvierdziŭ telekanału Clarin, što pry im byŭ znojdzieny zaradžany pistalet.
Zamach na Fiernandes de Kiršnier adbyŭsia na fonie rasśledavańnia hienprakurora krainy Dyjeha Łusijani, jaki ŭ kancy žniŭnia abvinavaciŭ vice-prezidentku ŭ karupcyi i paprasiŭ pryznačyć joj 12 hadoŭ turmy. Akramia turemnaha źniavoleńnia, prakuratura zapatrabavała zabaranić Kiršnier zajmać dziaržaŭnyja pasady i abaviazać jaje vypłacić štraf u pamiery $1 młrd.
