U siecivie ŭźniaŭsia skandał z-za «hreckaha adpačynku» žonki Piaskova, jakaja pad sankcyjami. Ale ž daremna
U vychadnyja Taćciana Naŭka apublikavała videa, na jakim jana ŭ restaranie bje talerki. «Heta častka šalonaha načnoha žyćcia ŭ Hrecyi», havaryłasia ŭ kamientaryi Naŭki da pasta. Adrazu niekalki vydańniaŭ vykazali zdahadku, što videa źniataje ŭ Hrecyi, kudy Naŭka nie moža ŭjazdžać z-za ŭviedzienych suprać jaje sankcyj ES. Paźniej videa vydalili.
Ułady Hrecyi apieratyŭna abvierhli, što žonka Piaskova ŭ abychod sankcyj zmahła trapić na terytoryju krainy.
Telehram-kanał «Ahientstvo. Novosti» vykazaŭ zdahadku, što Naŭka znachodzicca nie ŭ Hrecyi, a ŭ Turcyi.
U paście piać dzion tamu jana paziruje na fonie biblijateki Celsa — słavutaści ŭ tureckim Efiesie.
Paznali ŭ siecivie i interjer restarana, dzie Naŭka bje posud. Padobny interjer možna ŭbačyć na fotazdymkach restarana Manos pad Marmarysam (kala 240 km ad Efiesa).
Manos paznačany na sajcie kurorta D Maris Bay u liku inšych restaranaŭ, dastupnych naviedvalnikam kurorta.
Adna noč u numary dla dvaich u D Maris Bay na bližejšyja dni kaštuje 1600 Jeŭra, vynikaje z prajsa na sajcie. U vieraśni tut možna adpačyć tańniej — za 780-1020 jeŭra za sutki.
Restaran Manos apisvajecca jak «ažyŭlenaja plažnaja karčma z tradycyjnaj hreckaj kuchniaj i kulturaj». U liku zabaŭ dla haściej — raźbivańnie talerak, pa 20 lir (1,1 dalara) za kožnuju pry minimalnaj kolkaści ŭ 30 štuk. Jak vynikaje ź mieniu, sibas z hreckaj sałataj haściam abydziecca ŭ 120 dalaraŭ na dvaich, mieze i ryba-hryl z sałataj — u 150 dalaraŭ na dvaich, a strava na dvaich z sałaty, zakusak z morapraduktaŭ, krevietak, kraba i łobstaraŭ — u 309 dalaraŭ.
Sankcyi JEZ suprać Taćciany Naŭki byli ŭviedzienyja ŭ červieni. Pad imi znachodziacca taksama dzieci pres-sakratara Pucina. Abmiežavańni suprać siamji Piaskova dziejničajuć u ZŠA i Japonii.
Turcyja nie dałučyłasia da sankcyj suprać Rasii, što pavysiła jaje papularnaść siarod rasijskich turystaŭ.
