Kiraŭnik Słužby achovy dziaržmiažy Litvy: Biełaruskija pamiežniki z pomsty paškodžvajuć aharodžu
Biełaruskija pamiežniki praciahvajuć paškodžvać fizičnuju aharodžu na miažy ź Litvoj, skazaŭ kiraŭnik Słužby achovy dziaržmiažy (SADM) Rustam Lubajeŭ, paviedamlaje Delfi.lt.
«My možam skazać, što fizičny barjer paškodžvajuć naŭmysna. Biełaruskija pamiežniki robiać heta z pomsty, robiać heta demanstratyŭna navat tam, dzie heta fiksujuć našy sistemy. Adnak bolšaja častka paškodžańniaŭ fiksujecca tam, dzie sistem nazirańnia niama», — skazaŭ žurnalistam kiraŭnik SADM.
Lubajeŭ zaŭvažyŭ, što złavić škodnikaŭ składana, pakolki paśla naniasieńnia škody jany adrazu sychodziać i da pryjezdu pamiežnikaŭ na miescy ich nie znajści. A biełaruskija struktury na takija dziejańni nie reahujuć navat paśla taho, jak litoŭskija pamiežniki paviedamlajuć im pra heta.
«Kali bačać, što jedzie naš patrul, škodnickija dziejańni spyniajucca. Tady biełaruskija pamiežniki abo mihranty adrazu sychodziać u hłyb biełaruskaj terytoryi. My fiksavali vypadki naniasieńnia škody biełaruskimi pamiežnikami, navat pieradali aficyjnaje paviedamleńnie ŭ suviazi z hetym. Adkazu niejkaha nie było, albo adkazvajuć, što taki vypadak ustanavić nie ŭdałosia», — skazaŭ Lubajeŭ.
Pa słovach ministra ŭnutranych spraŭ, vidavočna, što hibrydnaja ataka suprać Litvy praciahvajecca. «Biełaruskija pamiežniki z nami nie supracoŭničajuć, suprać nas arhanizavanaja hibrydnaja ataka», — skazała Ahnie Biłatajcie.
Kali b jany byli zatrymanyja, u dačynieńni da ich užyli b sankcyi. «Fizičny barjer staić na litoŭskaj terytoryi. Takoha čałavieka zatrymali b i prymianili b u dačynieńni da jaho sankcyi za parušeńnie dziaržmiažy i za psavańnie majomaści», — zaŭvažyŭ Lubajeŭ.
