Ułady Estonii demantavali savieckija pomniki ŭ pieravažna ruskamoŭnaj Narvie
Svaje dziejańni estonskija ŭłady patłumačyli tym, što chočuć nie dapuścić pavyšeńnia ŭzroŭniu varožaści ŭ hramadstvie. «Uličvajučy, jak chutka narastaje napružanaść i błytanina vakoł miemaryjałaŭ u Narvie, my pavinny dziejničać chutka, kab zabiaśpiečyć hramadski paradak i ŭnutranuju biaśpieku», — zajaviła premjer-ministarka Kaja Kałas.
Ranicaj u aŭtorak palicyja i vajskoŭcy ačapili pierymietr vakoł histaryčnaha tanka T-34, jaki byŭ asnoŭnym savieckim vajskovym pomnikam u Narvie, pahruzili jaho na płatformu aŭtatrejlera i sa śpiecyjalnym supravadžeńniem vyvieźli z horada.
Tank adpravili ŭ Estonski vajskovy muziej, jaki znachodzicca na ŭskrainie Talina ŭ byłoj rezidencyi hienierała Jochana Łajdanera i dzie zajmajucca vyvučeńniem vojnaŭ, jakija zakranali Estoniju ciaham stahodździaŭ.
Narvienski tank hruzili na pryčep čatyry hadziny, padličyła ahienctva BNS. U hety čas byŭ pierakryty papularny pamiežny pierachod z Narvy ŭ rasijski Ivanhorad. Pra heta ranicaj paviedamili spačatku achvotnyja pierasiekčy miažu, a zatym rasijskija mytniki.
Palicyja Narvy jašče ranicaj papiaredžvała ab pierakryćci ruchu kala narvienskaha tanka i bližejšych pomnikaŭ, jakoje zakranie ŭ tym liku pahranpierachod u centry horada, jaki karystajecca papularnaściu ŭ žycharoŭ Pieciarburha i Leninhradskaj vobłaści.
Paviedamleńniaŭ pra pratesty ŭ suviazi z demantažom pomnika nie pastupała. Adnak palicyja zatrymała dzieviać čałaviek, jakija sprabavali zaklikać inšych da hvałtoŭnaha supraćstajańnia, paviedamlaje vydańnie Delfi. Pavodle jaho źviestak, da viečara da miesca, dzie stajaŭ tank, pačali ściahvacca ludzi. Jany prychodzili z kvietkami i śviečkami.
Pakul hruzili tank, śpiecyjalisty demantavali i inšyja savieckija pamiatnyja znaki: miemaryjalnuju došku na centralnaj Piatroŭskaj płoščy (z-za hetaha i była parušanaja praca miažy), abielisk kala Narvienskaha zamka i manumient «Try štyki»
