«Ja b staviŭ na 12 hod kałonii»: sudziać prakurora, jaki prasiŭ Niaklajevu try hady
Jak stała viadoma «Našaj Nivie», siońnia pačaŭsia sud nad vysokapastaŭlenym aficeram Śledčaha kamiteta, jakoha sudziać pa šaści artykułach Kryminalnaha kodeksa i abvinavačvajuć u datyčnaści da chabaru na $30 tysiač. Raniej jon sam prasiŭ prysudy palityčnym.
Andrej Kažeŭnikaŭ byŭ načalnikam pracesualnaha kantrolu Śledčaha kamiteta pa Minsku. Fota: Anłajnier
U sudzie Maskoŭskaha rajona Minska pačaŭsia sud nad Andrejem Kažeŭnikavym i Dźmitryjem Piskunom. Sudziać pa šaści artykułach Kryminalnaha kodeksa: dača chabaru, machlarstva, parušeńnie tajamnicy pierapiski, złoŭžyvańnie ŭładaj, atrymańnie chabaru.
Andrej Kažeŭnikaŭ — viadomy ŭ Minsku śledčy. Načalnik pracesualnaha kantrolu minskaha śledstva, heta vielmi vysokaja pasada. Ën kantralavaŭ, jak pracujuć inšyja śledčyja ŭ dvuchmiljonnym horadzie.
U hetym vypadku pakarańnie pryznačajecca pa sukupnaści złačynstvaŭ šlacham častkovaha abo poŭnaha składvańnia. Pa samym «ciažkim» artykule — art. 430 č.3 (atrymańnie chabaru) — Kažeŭnikavu pahražaje ad 5 da 15 hod pazbaŭleńnia voli.
Jak stała viadoma «Našaj Nivie», Kažeŭnikavu inkryminujuć udzieł u historyi z razhalinavanaj dačaj chabaru na sumu 30 tysiač dalaraŭ. Dakładnyja abstaviny nieviadomyja, Dźmitryj Piskun, jaki ź im prachodzić pa spravie, — kamiersant.
«U jaho byŭ vysoki post, heta pakazalnaja porka, pahražaje jamu minimum piacioračka, a kali jašče byŭ nie tych pohladaŭ, to chana, ja b staviŭ na 12 hod kałonii», — kaža kaleha sa struktury SK.
Admietna, što ŭ 2011-m Kažeŭnikaŭ pracavaŭ u prakuratury Frunzienskaha rajona Minska i vystupaŭ abvinavaŭcam na pracesie Uładzimira Niaklajeva, Nasty Pałažanka, Alaksandra Fiaduty i Vitala Rymašeŭskaha.
Tady jon zaprasiŭ pakaranni, nie źviazanyja z pazbaŭleńniem voli.
Dapoŭnić infarmacyju ci padzialicca navinoj možna naŭprost z aŭtaram praź biaśpiečny kantakt u telehramie @artsiom_harbatsevich ci praz mejł [email protected]
