Połk Kalinoŭskaha: Pakul nivodnaja palityčnaja siła nie prapanavała kankretnaha płana dziejańniaŭ pa vyzvaleńni Biełarusi
Połk Kalinoŭskaha pakul što dystancyjavaŭsia ad padtrymki palityčnych siłaŭ u demakratyčnym ruchu. Pra heta havaryłasia ŭ siońniašnim videa aficyjnaj pradstaŭnicy pałka Kryściny «Čabor».
Prysiaha navabrancaŭ Pałka Kalinoŭskaha. Fota: @belwarriors
Adkazvajučy na pytańnie ab tym, jaki palityčny ruch padtrymlivaje połk, jana adznačyła, što jaho bajcy majuć prava na svaje pohlady i mohuć padtrymlivać idei roznych palityčnych partyj i ruchaŭ, adnak pakul ni adna ź ich nie pradstaviła svajho płana vyzvaleńnia Biełarusi.
«Hałoŭnaje, što ŭsie vajary abjadnanyja ahulnaj metaj — vyzvaleńnie Biełarusi. My ruchajemsia da hetaj mety kankretnym šlacham: vykonvajem bajavyja zadačy, zmahajučysia na ŭkrainskaj ziamli z našym ahulnym voraham — Rasijaj.
Pakul što ni adna palityčnaja siła nie prapanavała kankretnaha płana dziejańniaŭ pa vyzvaleńni Biełarusi ad unutranaj i źniešniaj akupacyi, na padstavie jakoha možna było b kazać pra blizkaść našaha bačańnia sytuacyi i sposabaŭ jaje vyrašeńnia», — skazała jana.
Adkazvajučy na pytańnie ab adsutnaści pradstaŭnikoŭ pałka na kanfierencyi «Novaja Biełaruś, jana adznačyła, što Połk Kalinoŭskaha — padraździaleńnie USU i vykonvaje bajavyja zadačy na froncie. Akramia taho, kanfierencyja nie nasiła vajskovaha charaktaru i adpaviednyja pytańni tam nie zajaŭlalisia.
Hetak ža aściarožna pradstaŭnica pałka vykazałasia z nahody źjaŭleńnia siłavoha błoka ŭ Abjadnanym pierachodnym kabiniecie i kandydatury Valeryja Sachaščyka, jaki staŭ pradstaŭnikom pa abaronie i nacbiaśpiecy. Pa słovach «Čabor», rabić vysnovy adnosna kandydatury «vajennaha ministra» možna budzie tolki paśla taho, jak jon pradstavić kankretnuju prahramu dziejańniaŭ pa abaronie suvierenitetu i zabieśpiačeńni nacyjanalnaj biaśpieki.
