Śledčy kamitet: Za dva hady zaviedziena bolš za 11 tysiač kryminalnych spraŭ za «złačynstvy ekstremisckaj skiravanaści»
Śledčy kamitet padvioŭ vyniki pracy za pieršaje paŭhodździe i siarod inšaha nazvaŭ ličbu, jakaja śviedčyć pra maštaby razhornutaha ŭ Biełarusi paśla vybaraŭ 2020 hoda dziaržaŭnaha teroru. Pavodle źviestak SK, za pieryjad z 9 žniŭnia 2020 hoda pa 1 lipienia 2022 hoda ŭzbudžana bolš za 11 tysiač kryminalnych spraŭ «ab złačynstvach ekstremisckaj skiravanaści». To-bok, kali ŭličvać śpiecyfiku łukašenkaŭskaha «navajazu» — zaviedzienych pa palityčnych matyvach.
Śledčy kamitet u spravazdačy taksama narakaje, što, «niahledziačy na ŭstojlivaje źnižeńnie ŭzroŭniu złačynnaści, tendencyj da skaračeńnia nahruzki ŭ pracy viedamstva nie nazirajecca z-za rostu ciažkich i asabliva ciažkich złačynstvaŭ». Na razhladzie ŭ śledčych — amal 73 tysiačy zajaŭ i paviedamleńniaŭ ab «učynienych złačynstvach». Kolki ź ich palityčnych — nie ŭdakładniałasia.
U kožnym razie palityčnyja raspravy spyniać ci navat zapavolvać nie źbirajucca i nadalej. Asablivuju ŭvahu, padkreślivajecca ŭ spravazdačy, nieabchodna «nadać instytutu śpiecyjalnaj vytvorčaści i sfarmavać adzinuju praktyku». Havorka — pra niadaŭna ŭviedzienyja zavočnyja sudy, na jakich buduć sudzić tych apanientaŭ režymu, jakija vyjechali za miažu.
