Łukašenka pra «adciskańnie» doli ŭ Kłajpiedzie: Heta nie pavinna prajści biespakarana
Alaksandr Łukašenka zapatrabavaŭ pryniać miery ŭ suviazi z tym, što biełaruski bok byŭ faktyčna pazbaŭleny ŭłasnaści ŭ kłajpiedskim porcie. Adpaviednuju zajavu jon zrabiŭ na naradzie pa stvareńni partovych mahutnaściaŭ dla ekspartu biełaruskaj pradukcyi, paviedamlaje jaho pres-słužba.
Łukašenka źviarnuŭ uvahu na toje, što akramia sankcyj u dačynieńni da transparciroŭki kaliju, Litva taksama faktyčna zabrała ŭłasnaść biełaruskaha pradpryjemstva ŭ Kłajpiedzie. Z 2013 hoda «Biełaruśkalij» źjaŭlajecca ŭłaśnikam 30% akcyj Kłajpiedskaha terminała sypučych hruzaŭ VKT.
«Mała taho što hetyja sankcyi niezakonna ŭviali, dyk jašče i faktyčna zabrali vašu ŭłasnaść», — źviarnuŭsia Alaksandr Łukašenka da ŭdzielnikaŭ narady.
«Adcisnuli», — udakładniŭ premjer-ministr Raman Hałoŭčanka.
«Heta nie pavinna prajści biespakarana, — padkreśliŭ Łukašenka. — Pradumajcie i mnie dałažycie, jakija miery my možam i prymiem u najbližejšy čas i ŭ siarednieterminovaj pierśpiektyvie. Adbirać, adciskać ułasnaść nikomu nie dazvolena. Mała taho, što tam našy sanatoryi, dzie my lačyli čarnobylcaŭ, jak ty kažaš, «adcisnuli» (havorka ab sanatoryi «Biełoruśsija» ŭ łatvijskaj Jurmale, vymušanym spynić pracu praz sankcyi), tak i tut. Heta ž niemałyja hrošy. Tamu miery pavinny być pryniatyja jak siońnia-zaŭtra, i paślazaŭtra».