Pamiatajecie minčuka, jaki ŭ 2017-m vyratavaŭ na Dzień Voli bieł-čyrvona-bieły ściah z-pad noh amapaŭcaŭ? Zaraz jon prachodzić pa kryminałcy
«Ja nie moh tryvać, što naš ściah topčuć byki ŭ milicejskaj formie», — kazaŭ Andrej Asmałoŭski ŭ intervju ŚMI ŭ 2017 hodzie. Padčas akcyi na Dzień Voli, kali pačaŭsia razhon i zatrymańni, bieł-čyrvona-bieły ściah byŭ adkinuty na asfalt i apynuŭsia pobač z aŭtazakam, pad nahami amapaŭcaŭ. Tady Andrej padniaŭ jaho, uźniaŭ uharu i kryknuŭ «Uzdymajem ściah nazad!» Za heta mužčynu adrazu zatrymali. Praŭda, u toj ža viečar jon byŭ adpuščany dadomu navat biez pratakoła.
29 lipienia hetaha hoda Andreja zatrymali padčas «chapunu» členaŭ AHP. Voś što viadoma pra jaho los na hety momant.
Andruś Asmałoŭski, fota z sacsietak.
Historyja sa sprobaj vyratavać ściah stała miedyjnaj. Učynak tady nazyvali hierojskim, słohan Andrusia navat staŭ płakatam.
«Natchniŭ mianie svabodny duch, i voś taki ekspromt zdaryŭsia. Prosta aburyła, što naš rodny ściah topčuć amapaŭcy. Ja razumieŭ, što mianie schopiać, ale ŭ toj čas pra heta nie dumaŭ. Tym bolš, što zahadzia padrychtavaŭsia da zatrymańnia: skončyŭ svaje pryvatnyja spravy, dziełavyja pytańni, pieradaŭ peŭnyja pracoŭnyja paŭnamoctvy…
Jak heta było. Skrynšoty z videa, dzie Andrej padymaje ściah.
Kali ščyra, to ŭ mianie była takaja ideja: choć by niejak paŭpłyvać na astatnich ułasnym prykładam. Tamu pasprabavaŭ padniać ściah jak maha vyšej. Na ździŭleńnie, strašna nie było. Moj siabar, ź jakim ja byŭ, niejak zdoleŭ adbicca i ŭciačy, choć i jaho sprabavali zatrymać. A ja ŭžo prosta padumaŭ: pamirać — dyk ź pieśniaj», — tłumačyŭ jon svaje pavodziny žurnalistam.
Płakat, pryśviečany aktu ratavańnia ściaha, ździejśnienaha Andrusiom.
Ale heta nie adzinaja palityčnaja aktyŭnaść mužčyny: jon i raniej naviedvaŭ akcyi pratestu ŭ Minsku, byŭ zaŭsiodnikam dzion Voli. U 2004-m jaho razam ź inšymi šmatlikimi aktyvistami zatrymali paśla akcyj, prymierkavanych da 10-hodździa prezidenctva Łukašenki. Tady Andruś «abyšoŭsia» štrafam u 30 bazavych.
Andrej maje dvuch synoŭ, pa adukacyi — inžynier-budaŭnik. Pracavaŭ pa śpiecyjalnaści, zajmajučysia architekturnym prajektavańniem jak indyvidualny pradprymalnik.
U 2019 hodzie Asmałoŭski vyłučaŭsia ad AHP u deputaty Pałaty pradstaŭnikoŭ Nacyjanalnaha schodu siomaha sklikańnia — ad Kołasaŭskaj akruhi №106, aficyjna prajhraŭšy pieršamu prarektaru BDUIR Siarhieju Dziku.
Ciapier jon trapiŭ pad začystku čalcoŭ AHP: napiaredadni pryjšli pa lidara AHP Mikałaja Kazłova, staršyniu Minskaj haradskoj arhanizacyi Aksanu Alaksiejevu i jašče adnu ŭdzielnicu partyi — Antaninu Kavalovu. U hety ž momant nie vyjšaŭ z sutak, prysudžanych raniej, siabra AHP Artur Smalakoŭ.
Da Andrusia Asmałoŭskaha siłaviki zavitali 29 lipienia. Jak nam paćvierdzili siabry siamji, zatrymali i jaho hramadzianskuju žonku Dzijanu Čarnušynu (taksama siabroŭku AHP). Jak na Andrusia, tak i na inšych čalcoŭ partyi zaviali kryminalnuju spravu pa «narodnym» 342-m artykule (aktyŭny udzieł u hrupavych dziejańniach, jakija hruba parušajuć hramadski paradak).
Andruś i Dzijana. Fota: sacsietki.
Na siońnia ahułam u turmach, kałonijach i śledčych izalatarach znachodziacca 13 siabroŭ Abjadnanaj hramadzianskaj partyi.
Čytajcie taksama:
«Kali na kiepskaje paŭpłyvać nie možam, to dobraje — naša zona adkaznaści». Biełarusy znutry krainy pra toje, jak nie pieratvarycca ŭ raboŭ
«Zaraz my ciabie ŭ aŭtazak da tłustych zakiniem». Jak skłałasia historyja maładzionaŭ sa strašnaha fota, jakoje ablacieła ŭsiu krainu
Chto taki Valeryj Sachaščyk, jaki ŭznačaliŭ siłavy błok u kabiniecie Cichanoŭskaj
