Papularnaha jutubiera z Banhładeš zabrała palicyja. Jon śpiavaŭ pieśni na vieršy Rabindranata Tahora, ale rabiŭ heta biez pavahi
Jutubier z Banhładeš, jaki nabyŭ vialikuju papularnaść, śviadoma vykonvajučy papularnyja pieśni «mima not», zatrymała palicyja i zapatrabavała ad jaho pierastać zajmacca muzykaj. Muzyka paskardziŭsia, što jaho padviarhali «psichałahičnym katavańniam» — trymali ŭ adździaleńni vosiem hadzin, abražali i prymušali źmianić imia.
Hieroj Ałom. Fota: AFP
Hieroj Ałom — błohier i śpiavak z Banhładeš, jaki nabraŭ papularnaść vykanańniem piesień «mima not». Absurdnyja klipy na ŭłasnyja treki i niajomkija kaviery prynieśli artystu paŭtara miljona padpisčykaŭ i amal dva miljony fanataŭ na fejsbuku.
Adnak taki kantent vyklikaje nie tolki sprečki siarod słuchačoŭ, ale i prynosić davoli surjoznyja prablemy.
U pačatku žniŭnia Ałom raskazaŭ vydańniu AFP, što jaho zatrymali miascovyja palicyjanty. Pavodle jaho słoŭ, jaho padviarhali «psichałahičnym katavańniam», pratrymaŭšy ŭ adździaleńni kala vaśmi hadzin, patrabavali padpisać papieru z vybačeńniami za vykanańnie kłasičnych nacyjanalnych piesień i kazali, «što jon «zanadta vyrodlivy», kab być papularnym śpievakom.
Adzin z klipaŭ Hieroja Ałoma
Asnoŭnyja pretenzii ŭ palicyjantaŭ byli da «niepavažlivych kavieraŭ» na vieršy viadomych banhładešskich paetaŭ i muzykaŭ Kazi Nazruł Isłama i Rabidranata Tahora. Apošni asabliva ŭšanavany ŭ krainie jak pieršy ŭładalnik Nobieleŭskaj premii pa litaratury nie ź Jeŭropy.
Šef palicyi Daki, stalicy Banhładeš, paćvierdziŭ zatrymańnie artysta. Jon paviedamiŭ žurnalistam, što na Ałoma pastupała šmat skarhaŭ, ale ciapier jon paprasiŭ prabačeńnia za vykanańnie kłasičnych piesień i našeńnie palicejskaj formy ŭ adnym z klipaŭ. «Jon pierahledzieŭ styl śpievaŭ i zapeŭniŭ, što padobnaha bolš nie paŭtorycca», — dadaŭ kiraŭnik departamienta.
Pry hetym namieśnik kamisara palicyi adznačyŭ, što niekatoryja zajavy Ałoma nie adpaviadajuć rečaisnaści, naprykład, adnosna taho, što jaho sprabavali prymusić źmianić imia, admoviŭšysia ad «statusu hieroja». «Jon prydumlaje heta tolki dla taho, kab pryciahnuć pabolš uvahi ŭ sacsietkach», — zajavili ŭ palicyi.
Klip, vypuščany paśla zatrymańnia
Nieŭzabavie paśla vyzvaleńnia Ałom vypuściŭ novy klip, u jakim jon siadzić za kratami ŭ turemnaj robie i śpiavaje pra toje, što jaho nibyta mohuć paviesić.
Na jutubie i ŭ sacsietkach padtrymali artysta — karystalniki rascanili historyju jak zamach na pravy čałavieka i nazvali dziejańni palicejskich niedapuščalnymi, navat kali śpievy błohiera razdražniajuć ich ci słuchačoŭ.
Akramia muzyčnaj karjery, Ałom źniaŭsia ŭ niekalkich filmach, a ŭ 2018 hodzie navat udzielničaŭ u parłamienckich vybarach. Spačatku jamu niekalki razoŭ admaŭlali ŭ vyłučeńni ad miascovaj partyi, ale ŭrešcie dazvolili ŭdzielničać u jakaści niezaležnaha kandydata. Vyłučeńnie pryciahnuła takuju ŭvahu, što imia Ałoma trapiła na druhoje miesca ŭ Google Trends siarod palitykaŭ Banhładeš, ale pa vynikach hałasavańnia jon nabraŭ usiaho 863 hałasy.
