Byłoha pasła Ukrainy ŭ Biełarusi padazrajuć u dziaržaŭnaj zdradzie
Dziaržaŭnaje biuro rasśledavańniaŭ Ukrainy pradjaviła abvinavačvańni byłomu ministru abarony i byłomu pasłu Ukrainy ŭ Biełarusi Michaiłu Ježalu za ŭzhadnieńnie charkaŭskich pahadnieńniaŭ 2010 hoda ab znachodžańni Čarnamorskaha fłotu Rasii ŭ Krymie.
Prezidenty Ukrainy i Rasii 21 krasavika 2010 hoda Viktar Janukovič i Dźmitryj Miadźviedzieŭ padpisali ŭ Charkavie pahadnieńni ab umovach znachodžańnia ŭ Krymie Čarnamorskaha fłotu RF.
Zhodna z hetym dakumientam, znachodžańnie fłotu na Ukrainie było padoŭžana z 2017 hoda na 25 hadoŭ.
«Admirał, jaki ŭ svoj čas byŭ hałoŭnakamandujučym Vajenna-marskich sił Ukrainy i razumieŭ usie ryzyki padaŭžeńnia znachodžańnia rasijskaha fłotu na terytoryi Ukrainy, uzhadniŭ uvieś pakiet dakumientaŭ nieabchodnych dla implemientacyi pahadnieńnia pamiž Ukrainaj i RF pa pytańniach znachodžańnia Čarnamorskaha fłotu Rasijskaj Fiederacyi na terytoryi Ukrainy ad 21 krasavika 2010 hoda, t. zv. charkaŭskich pahadnieńniaŭ», — havorycca ŭ paviedamleńni.
Prajekty hetych dakumientaŭ ministr abarony Ukrainy ŭzhadniŭ navat nie naviedaŭšy pasiadžeńnie Kabinieta ministraŭ Ukrainy 21 krasavika 2010 hoda, na jakim jany abmiarkoŭvalisia, a taksama biez praviadzieńnia abaviazkovaj pravavoj ekśpiertyzy ab adpaviednaści prajekta pahadnieńnia Kanstytucyi i zakonam Ukrainy.
Z-za hetaha byli stvorany ŭmovy dla padaŭžeńnia znachodžańnia Čarnamorskaha fłotu RF na terytoryi Ukrainy na 25 hadoŭ, što spryjała naroščvańniu vajennaj techniki i asabistaha składu Uzbrojenych Sił Rasijskaj Fiederacyi.
***
Michaił Ježal zajmaŭ pasadu ministra abarony Ukrainy ŭ 2010-2012 hadach. U dalejšym jon byŭ pryznačany pasłom Ukrainy ŭ Biełarusi i pracavaŭ na hetaj pasadzie da maja 2015 hoda. Sam Ježal paśla svajho adklikańnia z pasady pasła žyvie ŭ Biełarusi jak pryvatnaja asoba. U 2018 hodzie jon atrymaŭ u Biełarusi status biežanca.
