Mścisłaŭskaha ideołaha pakarali za nieŭstalavańnie miemaryjalnaj šyldy biełaruskamu movaznaŭcu
Krajaznaviec i były piedahoh Uładzimir Kažamiaka, jaki rodam ź Mścisłaŭščyny, šmat hadoŭ daśleduje tvorčaść Janki Bialkieviča (1883-1960) — piedahoha, daśledčyka biełaruskaj movy, byłoha dyrektara Mścisłaŭskaha piedtechnikuma, jaki prajšoŭ stalinskija łahiery. Krajaznaŭca dabiŭsia ŭšanavańnia Bialkieviča ŭ Mścisłavie, ale čynoŭniki paabiacali, dy zabylisia, piša Radyjo Racyja.
Budynak byłoha piedahaničnaha technikuma, dzie pavinna być ustalavanaja šylda
Letaś na imia Uładzimira Kažamiaki pryjšoŭ list ź Mścisłaŭskaha rajvykankama, dzie paviedamlałasia, što «rajvykankam atrymaŭ zaklučeńnie ź Ministerstva kultury Respubliki Biełaruś ab metazhodnaści stvareńnia i ŭstanoŭki pamiatnaj doški ŭ honar I.K. Bialkieviča. Bližejšym časam budzie raspracavany eskizny prajekt pamiatnaj doški i ŭzhodnieny ŭ Mahiloŭskim abłasnym mastacka-ekśpiertnym saviecie pa manumientalnym i manumientalna-dekaratyŭnym mastactvie. Paśla atrymańnia adpaviednaha zaklučeńnia budzie vyrašana pytańnie ab stvareńni doški».
Janka Bialkievič
Prajšoŭ hod, ale doška tak i nie źjaviłasia na budynku byłoha piedtechnikuma ŭ Mścisłavie. Uładzimir Kažamiaka znoŭ źviarnuŭsia ŭ Mścisłaŭski rajvykankam. Akazałasia, što miemaryjalnaja doška, pryśviečanaja Janku Bialkieviču, nie źjaviłasia «pa vinie namieśnicy načalnika ideałahičnaj pracy, kultury i pa spravach moładzi rajvykankama» Taćciany Simčanka, za što supracoŭnica «pryciahnuta da dyscyplinarnaj adkaznaści».
Tym nie mienš, jak abiacaje staršynia Mścisłaŭskaha rajvykankama Dźmitryj Pimašenka, miemaryjalnaja doška, pryśviečanaja Janku Bialkieviču, sioleta budzie ŭstalavanaja.
