Para kupiła sabie cełuju viosku ŭ Francyi pa canie adnapakajoŭki ŭ Viciebsku
Zakinutyja viaskovyja damy ŭ jeŭrapiejskich krainach možna nabyć zusim niadoraha. Cełaja vioska La-Buślijer u Narmandyi kaštavała mienš za 27 tysiač jeŭra.
27 tysiač jeŭra heta pa siońniašnim kursie 27 tysiač dalaraŭ. Za takija hrošy nie kupiš navat adnapakajoŭku ŭ minskaj panelcy, chiba što niešta samaje tannaje ŭ Viciebsku ci Kobrynie.
Poł Mepli i Ip Uord, 48-hadovyja łandšaftnyja dyzajniery z Brytanii, zadumalisia pra nabyćcio nieruchomaści ŭ Francyi paśla taho, jak nie ŭdałosia sabrać na ŭłasnuju nieruchomaść u siabie na radzimie.
U Brytanii nieruchomaść kaštuje doraha, a ŭłazić u kredyty mužčyny nie chacieli. U 2019 hodzie jany ŭ vyniku nabyli całkam prystojny domik u La-Buślijery ŭsiaho za 12 tysiač jeŭra.
Pastupova jany skupili reštu budynkaŭ u biaźludnaj vioscy, raskazała prahrama brytanskaha Channel 4 «Ratujcie! My kupili viosku».
U adroźnieńnie ad husta zasielenaj Anhlii, addalenyja rajony Francyi pieražyvajuć takuju ž depapulacyju, jak niekatoryja kutki našaj Viciebščyny. Ale tam zbudavanyja nie draŭlanyja chaty, jak u nas, jakija chutka zaniepadajuć, kali ich nie aciaplać zimoj i nie pravietryvać, a mocnyja kamiennyja budynki.
Ciapier para vałodaje niekalkimi damami, dvuma chlavami, stajniaj, dvuchuzroŭnievaj majsterniaj, vyciskalniaj soku dla vyrabu sidru i nievialikaj staroj piakarańkaj. I ŭsio heta na 80 sotkach ziamli.
Brytancy chočuć pieratvaryć viosku ŭ miesca adpačynku. Adnak heta zapatrabuje niemałych inviestycyj. Davieści da ładu staryja budynki nie tak prosta.
U niekatorych jeŭrapiejskich krainach, da prykładu, u Italii, miascovyja ŭłady vydzialajuć datacyi ludziam, jakija hatovyja ŭziać staryja siadziby i dahladać ich. Takim sposabam tam dajuć druhoje žyćcio starym sieliščam.
