ZŠA vydzialajuć Ukrainie novy pakiet dapamohi na 400 młn dalaraŭ i dadatkovyja HIMARS
ZŠA pieradaduć Ukrainie jašče bolš reaktyŭnych sistem załpavaha ahniu vialikaj dalokaści i novyja vysokadakładnyja artyleryjskija snarady ŭ ramkach novaha pakieta ŭzbrajeńniaŭ na 400 miljonaŭ dalaraŭ. Pakiet budzie ŭklučać čatyry vysokamabilnyja artyleryjskija rakietnyja sistemy, viadomyja jak HIMARS, z bojeprypasami, paviedamiŭ žurnalistam 8 lipienia vysokapastaŭleny amierykanski čynoŭnik sa śfiery abarony, pieradaje Radyjo Svaboda.
Čynoŭnik na ŭmovach ananimnaści skazaŭ, što dadatkovyja HIMARS dazvolać pavialičyć ahulnuju kolkaść hetych sistem, dasłanych u Ukrainu ź minułaha miesiaca, da 12-ci.
ZŠA pačali adpraŭlać sistemy paśla taho, jak atrymali zapeŭnieńni Kijeva, što USU nie buduć vykarystoŭvać ich dla paražeńnia celaŭ na terytoryi Rasii. Radyus dziejańnia RSZA HIMARS — da 80 km, adnak u peŭnaj madyfikacyi i pry ŭmovie pastaŭki adpaviednych bojeprypasaŭ jon moža składać i 300—500 km.
Uzbrojenyja siły Ukrainy vykarystoŭvali HIMARS dla ŭdaru, u pryvatnaści, pa składach bojeprypasaŭ. Ale USU nie vykarystoŭvali ich dla ŭdaraŭ pa-za miežami Ukrainy, dadaŭ čynoŭnik. Jany «paśpiachova nanosili ŭdary pa rasijskich abjektach va Ukrainie, hłybiej za linijaj frontu, i parušyli zdolnaść Rasii pravodzić artyleryjskija apieracyi», padkreśliŭ jon.
Heta maje być užo 15-y pakiet vajennaha zbroi i techniki, pieradadzieny amierykancami Ukrainie sa žniŭnia minułaha hoda.
