U Polščy hrupu biełarusaŭ i ŭkraincaŭ padazrajuć u kibierzłačynstvach
Uzrost udzielnikaŭ mierkavanaj złačynnaj hrupoŭki — ad 23 da 51 hoda. Jany niezakonna atrymlivali dostup da bankaŭskich rachunkaŭ.
Va Urocłavie zatrymali hrupu hramadzian Biełarusi i Ukrainy, jakuju padazrajuć u arhanizacyi «fišynhu». Šerahu fihurantaŭ vystavili abvinavačańni ŭ anłajn-machlarstvie. Adnaho taksama abvinavačvajuć u zachoŭvańni parnahrafii z udziełam niepaŭnaletnich, a inšaha — u admyvańni hrošaj. Ahułam pa spravie prachodziać piać čałaviek, paviedamlaje polskaja palicyja.
Pavodle śledstva, abvinavačanyja «pracavali» na papularnaj handlovaj placoŭcy. Jany dasyłali pradaŭcam spasyłki na fišynhavy sajt praz WhatsApp pad markaj pravierki pastupleńnia apłaty za tavar. Tak fihuranty atrymlivali danyja dla dostupu da bankaŭskich rachunkaŭ, adkul srodki zatym pieravodzilisia na inšyja rachunki, afarmlalisia kredyty, kuplałasia technika.
Ahulnaja suma škody aceńvajecca ŭ 50 tysiač złotych. Padčas vobšuku ŭ ich kanfiskavali kampjutarnuju techniku, 15 tysiač złotych, nośbity infarmacyi, elektroniku, nabytuju na vykradzienyja srodki.
Pa rašeńni suda dvoje zatrymanych časova aryštavanyja na 3 miesiacy. U dačynieńni 23-hadovaha fihuranta prakuror užyŭ palicejski nahlad z vymańniem pašparta i zabaronaj na vyjezd z krainy.
U nastupnyja dni va Urocłavie palicyja zatrymała jašče adnaho čałavieka, źviazanaha z apisanym vypadkam. 36-hadovy hramadzianin Ukrainy abvinavačany ŭ admyvańni hrošaj ašukanskim šlacham. Jamu pahražaje pakarańnie da 8 hadoŭ pazbaŭleńnia voli. Mužčynu źmiaścili pad nahlad palicyi. Jamu taksama zabaroniena pakidać Polšču, ale z zachavańniem pašparta.
Palicyja jašče raz papiaredziła ludziej pra toje, što ŭ vypadku ŭźniknieńnia choć niejkich sumnievaŭ u sumlennaści internet-abviestki ci patrabavańniaŭ taho, chto na płatformach anłajn-prodažu vydaje siabie za pradaŭca ci pakupnika, treba być aściarožnym i źviarnucca ŭ palicyju.