Łatvija źbirajecca viarnucca da vajskovaha pryzyvu
Ministr abarony Łatvii Arcis Pabryks na pres-kanfierencyi 5 lipienia zajaviŭ, što ciaham piaci hadoŭ u Łatvii pavinna źjavicca słužba abarony krainy. Spačatku jana budzie dobraachvotnaj, a zatym ŭsieahulnaj. Ciapierašniaja ž sistema vajskovaj słužby ŭ Łatvii, na jaho dumku, siabie vyčarpała, piša delfi.lv. Kančatkova zrazumieła heta stała paśla ahresii Rasii na Ukrainu.
Fota: flickr.com
Z 2023 pa 2028 hod zapłanavany pierachodny pieryjad, kali maładyja mužčyny (18—27 hadoŭ) zmohuć słužyć u vojsku na dobraachvotnaj asnovie. Zatym słužba stanie abaviazkovaj. Uviadzieńnie novaj sistemy słužby pavinien pryniać Siejm.
Zhodna z płanam Minabarony, 1 studzienia 2023 hoda pačniecca pieršy dobraachvotny pryzyŭ, u ramkach jakoha na słužbu płanujuć pryniać 500 čałaviek. Jany mohuć vybrać adzin z čatyroch vidaŭ słužby, termin jakoj składzie 11 miesiacaŭ, u tym liku adzin miesiac adpačynku. Vychadnyja pryzyŭniki zmohuć pravodzić doma. Dobraachvotna zmohuć pryzvacca i žančyny.
Meta Minabarony — na praciahu piaci hadoŭ dasiahnuć taho, kab struktura Nacyjanalnych uzbrojenych siłaŭ Łatvii va ŭmovach vajennaha času dasiahała 50 000 čałaviek, u tym liku kolkaść aktyŭnych padraździaleńniaŭ — 14 000, padraździaleńniaŭ Ziemiesardzie (terytaryjalnaj abarony) — 16 000, a vajskoŭcaŭ zapasu — 20 000 čałaviek.
Kančatkova rašeńnie pakul nie pryniata. Pabryks adznačyŭ, što pa prapanavanaj Minabarony reformie čakajecca dyskusija, i viedamstva adkryta dla prapanoŭ. A prafiesijnaje vojska tak ci inačaj praciahnie isnavać.
Łatvija pryniała rašeńnie ab admovie ad abaviazkovaj vajskovaj słužby ŭ 2006 hodzie.