Čysty adtok piersanału ź IT-siektara z pačatku hoda skłaŭ 5500 čałaviek
U biełaruskim IT-siektary paskoryŭsia adtok śpiecyjalistaŭ. Usiaho za maj z kampanij zvolniłasia 3600 śpiecyjalistaŭ, a z pačatku hoda — 12000, paviedamlaje Dev.by.
Čysty adtok u IT-siektary za 5 miesiacaŭ (roźnica pamiž naniatymi i zvolnienymi) — minus 5500 čałaviek. U niaprostyja 2020 i 2021 hady siektar za anałahičny pieryjad krychu dadavaŭ u kolkaści — +553 i +697 śpiecyjalistaŭ, adpaviedna. Da pandemii i kryzisnych pieryjadaŭ, u 2019-m, rost byŭ adčuvalny — 1709 čałaviek,
U mai kampanii abnavili rekord pa zvalnieńniach, pry hetym najom upaŭ da minimalnaha ŭzroŭniu za apošnija dva hady.
Pa danych aficyjnaj statystyki, za maj kampanii zvolnili amal 3,6 tysiačy supracoŭnikaŭ. Heta značna bolš, čym u mai minułaha hoda (amal u try razy), i + 10% da krasavika 2022. I ŭ 4,5 razu bolš, čym naniali.
Pry hetym u apošnija try miesiacy paskoryŭsia temp zvalnieńnia IT-śpiecyjalistaŭ. U sakaviku zvolniłasia na 85% bolš, čym u sakaviku 2021, u krasaviku — na 123% bolš, čym u krasaviku 2021, u mai — na 173% bolš, čym u mai 2021 (tady kolkaść zvolnienych užo išła na spad).
U svaju čarhu, najom u IT padaje treci miesiac zapar. U mai ŭ kampanii pracaŭładkavalisia amal 800 śpiecyjalistaŭ — na 53% mienš, čym u mai minułaha hoda. Bolš za toje, tak mała śpiecyjalistaŭ kampanii ŭziali na pracu ŭpieršyniu za apošnija amal dva hady (ź lipienia 2020).
Kali razhladać pieryjad z pačatku 2019-ha, to za hetyja amal try z pałovaj hady kampanii mienš najmali tolki ŭ pandemijnaj jamie, u krasaviku — červieni 2020-ha.
Usiaho za piać miesiacaŭ IT-kampanii ŭziali na pracu bolš za 6,2 tysiačy śpiecyjalistaŭ — na 12% mienš, čym za anałahičny pieryjad 2021 hoda.
Ź IT-kampanij za studzień-travień zvolniłasia amal 12 tysiač čałaviek — na 85% bolš, čym za anałahičny pieryjad minułaha hoda.
Jak vynik:
za piać miesiacaŭ hetaha hoda IT — kampanii zvolnili bolš supracoŭnikaŭ, čym za ŭvieś 2020 hod, tady było zvolniena bolš za 10 tysiač (u 2021-m — amal 17 tysiač za hod);
ajcišniki skłali 4,5% ad usich zvolnienych śpiecyjalistaŭ u Biełarusi za studzień-maj.
Usiaho za studzień-maj ź IT-kampanij zvolniłasia na 90% bolš śpiecyjalistaŭ, čym pracaŭładkavałasia.
Čysty adtok ajcišnikaŭ za piać miesiacaŭ — 5,5 tysiačy čałaviek. Pavodle źviestak Biełstata, u 2021 hodzie ŭ śfiery «Infarmacyjnyja technałohii i dziejnaść u halinie infarmacyjnaha absłuhoŭvańnia» pracavali 104 tysiačy čałaviek. Heta značyć, za piać miesiacaŭ tolki pa aficyjnych danych IT-siektar straciŭ bolš za 5% supracoŭnikaŭ.
