Prezident Kazachstana paabiacaŭ dapamahčy Jeŭropie z naftaj i hazam
Kazachstan hatovy vykarystoŭvać svoj vuhlevadarodny patencyjał dla stabilizacyi situacyi na suśvietnych rynkach. Pra heta zajaviŭ prezident krainy Kasym-Žamart Takajeŭ padčas telefonnaj razmovy z prezidentam Jeŭrapiejskaha savieta Šarlem Mišelem, paviedamlaje pres-słužba prezidenta Kazachstana.
Kasym-Žamart Takajeŭ. Fota: pres-słužba prezidenta Kazachstana
Takajeŭ vykazaŭ zaniepakojenaść u suviazi z pahrozami enierhietyčnaj biaśpieki ŭ śviecie. Kazachstan, pa jaho słovach, hatovy vykarystoŭvać svoj vuhlevadarodny patencyjał z metaj stabilizacyi situacyi na suśvietnych i jeŭrapiejskich rynkach.
Pa słovach Takajeva, kraina prychilnaja da raźvićcia ŭstojlivych suviaziaŭ ź Jeŭrasajuzam — najbujniejšym handlovym partnioram Kazachstana.
Paśla napadu Rasii na Ukrainu 24 lutaha ES udvaja skaraciŭ svaju zaležnaść ad rasijskaha hazu — prykładna da 20% ad ahulnaha abjomu pastavak. Ale krainy Jeŭropy ŭžo vykarystali bolšaść varyjantaŭ dyviersifikacyi pastavak, takich jak impart zvadkavanaha hazu moram.
Pačynajučy z krasavika, Rasija spyniła pastaŭki ŭ Bałharyju, Polšču, Finlandyju, Niderłandy, Daniju i značna skaraciła hazavuju płyń u Hiermaniju. Krainy Bałtyi sami spynili impartavać haz z Rasii.
Mižnarodnaje enierhietyčnaje ahienctva (MEA) ličyć, što Jeŭropa pavinna terminova rychtavacca da taho, što Rasija zimoj moža całkam pierakryć pastaŭki hazu.
