Erdahan: Šviecyja paabiacała ekstradavać u Turcyju 73 čałavieki. Kali ich nie vydaść — nie ratyfikujem pahadnieńnie
Prezident Turcyi Redžep Taip Erdahan zajaviŭ, što Šviecyja paabiacała ekstradavać u Turcyju 73 čałavieki, jakich Ankara padazraje ŭ teraryźmie. Pra heta Erdahan skazaŭ padčas pres-kanfierencyi ŭ Madrydzie, paviedamlaje CNN.
Kali abiacańnie nie budzie vykanana, Turcyja moža zabłakavać zaprašeńnie Šviecyi ŭ NATA praź nieratyfikacyju pahadnieńnia svaim parłamientam, adznačyŭ turecki lidar.
U miemarandumie, jaki składajecca z 10 artykułaŭ, havorycca pra toje, što Šviecyja i Finlandyja daduć adkaz na zapyty Turcyi ab ekstradycyi padazravanych u teraryźmie ŭ adpaviednaści ź Jeŭrapiejskaj kanviencyjaj ab vydačy.
29 červienia ŭ kamientary CNN premjer-ministr Šviecyi Mahdalena Andersan paviedamiła, što kraina raspačnie kroki pa «supraćdziejańni terarystam», ale «budzie prytrymlivacca šviedskich i mižnarodnych kanviencyj, kali havorka pojdzie ab ekstradycyi».
11 červienia Ministerstva justycyi Finlandyi admoviła Turcyi ŭ vydačy asob, jakich jana ličyć členami terarystyčnaj arhanizacyi, paviedamlaje Yle. Havorka idzie pra zapyty na ekstradycyju, jakija Turcyja nakiravała ŭ Finlandyju ŭ 2019-2022 hadach.
U pačatku červienia hetaha hoda Chielsinki atrymaŭ ad Ankary dziesiać zapytaŭ na ekstradycyju, pa siami ź jakich było pryniata rašeńnie, dva čałavieki ekstradavali.
29 červienia na samicie ŭ Madrydzie NATA zaprasiła Šviecyju i Finlandyju ŭstupić u NATA. Ciapier zaprašeńnie pavinny ratyfikavać parłamienty 30 krain — čalcoŭ NATA.
