Adnu z arhanizatarak śviata dla ŭkrainskich dziaciej u Homieli zabrali ŭ IČU
Źjavilisia padrabiaznaści ŭčarašniaj situacyi z razhonam dabračynnaha mierapryjemstva dla dziaciej biežancaŭ z Ukrainy ŭ Homieli. Pra toje, što stała z čałaviekam, jaki jaho arhanizoŭvaŭ, piša Radyjo Svaboda.
Ała Karalenka
27 červienia ŭ Homieli miełasia prajści śviata dla ŭkrainskich dziaciej, jakija ŭciakli ad vajny. Ale ŭdzielnikaŭ, jakija sabralisia ŭ parku pałaca Rumiancavych i Paskievičaŭ, razahnała milicyja. Siońnia, 29 červienia, milicyja zatrymała adnu z arhanizatarak śviata.
Dziaŭčynka Alisa sa svajoj babulaj pryjechała ŭ Homiel, ratujučysia ad vajny, z Danieckaj vobłaści Ukrainy. 27 červienia ŭ dziaŭčynki byŭ dzień naradžeńnia — 9 hadoŭ. Jana vyrašyła zładzić akcyju — zrabić na prodaž papiarovych «hałuboŭ miru» i takim čynam naźbirać hrošy na padarunak. Z dapamohaj miascovych valancioraŭ vyrašana było arhanizavać śviata dla ŭkrainskich dziaciej, jakija vymušana žyvuć u Homieli.
Śviata nazvali «Dzień dnioŭ naradžeńnia».
Mierkavałasia, što ŭ prahramie buduć hulni, konkursy, suvieniry i padarunki. Abaviazkovaj umovaj było prynieści z saboj «hołuba miru» ci zrabić jaho razam na sustrečy.
Ale milicyja «skarektavała» płany. Dziciačaje śviata ŭsio-taki adbyłosia — ale ŭ inšym miescy.
29 červienia pa adnu z arhanizatarak, žycharku Homiela Ału Karalenka, pryjšła milicyja. Paźniej Svabodzie stała viadoma, što Ała ŭ IČU. Pavodle jakoha artykuła — u izalatary kazać admovilisia.
«Ź blizkich svajakoŭ u Biełarusi ŭ Ały tolki mama 85 hadoŭ, pakul joj nie paviedamlali. U suviazi z hetym niama kamu navat pieradać rečy i ježu. Moža, adhuknucca jaje siabry ci svajaki», — paviedamiŭ znajomy žančyny vydańniu «Fłahštok».
Praŭładnyja telehram-kanały vykazalisia, što milicyja ŭmiašałasia ŭ śviata, bo bajałasia «pravakacyj i palityčnych łozunhaŭ», a na masavaje mierapryjemstva jaho ŭdzielniki nie padali zajaŭku ŭ harvykankam.
